ബുധനാഴ്ച രാവിലെ 11.30ന് ദമ്മാമിൽ നിന്ന് കോഴിക്കോട്ടേക്ക് പുറപ്പെടേണ്ട ഇൻഡിഗോ എയർലൈൻസ് വിമാനം യന്ത്ര തകരാറിനെ തുടർന്ന് പുറപ്പെടാൻ വൈകുന്നു. ഇൻഡിഗോ എയർലൈൻസിന്റെ എ 239 വിമാനം ആണ് മണിക്കൂറുകൾ വൈകിയിട്ടും പുറപ്പെടാനാവാതെ യാത്രക്കാരെ ദുരിതത്തിലാക്കിയിരിക്കുന്നത്.
ആദ്യം ഒരു മണിക്കൂർ വൈകും എന്നാണ് അധികൃതർ അറിയിച്ചിരുന്നത്. പിന്നീട് ഉച്ചയ്ക്ക് 12.30ഓടെ യാത്രക്കാരെ വിമാനത്തിൽ പ്രവേശിപ്പിച്ചു. എന്നാൽ നാല് മണിക്കൂറോളം കഴിഞ്ഞിട്ടും വിമാനം പുറപ്പെട്ടിട്ടില്ല. ഇപ്പോൾ യാത്രക്കാരെ പുറത്തിറക്കിയിരിക്കുകയാണ്. യന്ത്ര തകരാർ മൂലമാണ് വിമാനം വൈകുന്നത് എന്നാണ് ഉദ്യോഗസ്ഥർ നൽകുന്ന വിശദീകരണം.
എന്നാൽ യാത്ര അനിശ്ചിതമായി നീണ്ടതോടെ സ്ത്രീകളും കുട്ടികളും ഉൾപ്പെടെയുള്ള യാത്രക്കാർ ദമ്മാം കിങ് ഫഹദ് ഇന്‍റർനാഷനൽ വിമാനത്താവളത്തിൽ ഇപ്പോഴും കുടുങ്ങി കിടക്കുകയാണ്. അതേസമയം പ്രശ്നം പരിഹരിച്ച് വൈകാതെ പുറപ്പെടും എന്നാണ് വിമാന കമ്പനി അധികൃതർ അറിയിച്ചത്.
