ഒമാനില്‍ കനത്ത മഴയ്ക്കും മിന്നല്‍ പ്രളയത്തിനും സാധ്യതയുണ്ടെന്ന മുന്നറിയിപ്പുമായി സിവിൽ ഏവിയേഷൻ അതോറിറ്റി. നാളെ വരെ മഴയ്ക്ക് പുറമെ ശക്തമായ കാറ്റിനും ഇടിമിന്നലിനും സാധ്യതയുണ്ട്. അതിനാൽ ജനങ്ങൾ ജാഗ്രത പാലിക്കണമെന്ന് അധികൃതർ നിർദേശിച്ചു.
മസ്കത്ത്, തെക്കൻ ശർഖിയ, അൽ വുസ്‌ത, ദോഫാർ ഗവർണറേറ്റ് എന്നിവിടങ്ങളിലാണ് ശക്തമായ മഴയ്ക്കും കാറ്റിനും സാധ്യതയുള്ളത്. അതേസമയം വടക്കൻ ഗവർണറേറ്റുകളിൽ അന്തരീക്ഷം മേഘാവൃതമായിരിക്കുമെന്നും ഒമാൻ കടലിന്റെ തീരങ്ങളിൽ തിരമാലകൾ ഉയർന്നേക്കുമെന്നും അധികൃതർ അറിയിച്ചു.
മഴ ശക്‌തമായാൽ വാദികൾ നിറഞ്ഞൊഴുകുകയും വെള്ളക്കെട്ടുണ്ടാവുകയും ചെയ്യും. അതിനാൽ ജനങ്ങൾ വാദികൾ മുറിച്ച് കടക്കാൻ ശ്രമിക്കരുതെന്നും വെള്ളക്കെട്ടുള്ളതും താഴ്ന്നതുമായ പ്രദേശങ്ങളിലേയ്ക്ക് പോകരുതെന്നും സിവിൽ ഏവിയേഷൻ അതോറിറ്റി നിർദേശിച്ചു.
