ഭാര്യ സങ്കല്പത്തിലുള്ളത് പോലെ സൗന്ദര്യവതി അല്ലെന്നും മറ്റുള്ള സ്ത്രീകളുമായി സ്വന്തം ഭാര്യയെ താരതമ്യപ്പെടുത്തുന്നതും പരിഹസിക്കുന്നതും ഒരു ഭാര്യയ്ക്കും സഹിക്കാനാവാത്ത മാനസിക ക്രൂരതയായിരിക്കുമെന്ന് ഹൈക്കോടതി. ഭാര്യ ഭർത്താവിന്റെ പ്രതീക്ഷകൾക്കൊത്ത് ഉയരുന്നില്ലെന്ന അധിക്ഷേപവും ക്രൂരതയാണ്. ഇവയെല്ലാം വിവാഹമോചനത്തിനുള്ള കാരണമായി പരിഗണിക്കാമെന്ന് ഹൈക്കോടതി വ്യക്തമാക്കി.
ക്രൂരതയെന്നാൽ ശാരീരിക ഉപദ്രവം മാത്രമല്ല മാനസികവുമാകാമെന്നാണ് മുൻ കോടതി വിധികൾ ഉദ്ധരിച്ചുകൊണ്ട് ജസ്റ്റിസുമാരായ അനിൽ. കെ.നരേന്ദ്രൻ, സി.എസ്.സുധ എന്നിവരടങ്ങിയ ഹൈക്കോടതി ഡിവിഷൻ ബെഞ്ച് വ്യക്തമാക്കിയത്. കാലാനുസൃതമായി മാറ്റം വരുമെന്നതിനാൽ ക്രൂരതയ്ക്ക് സമഗ്രമായ ഒരു നിർവചനം നൽകാൻ ബുദ്ധിമുട്ടാണ്. മോശം ഭാഷ ഉപയോഗിച്ച് വാക്കാലുള്ള അധിക്ഷേപങ്ങളും മാനസിക ക്രൂരതയിൽ വരുമെന്ന് കോടതി ചൂണ്ടിക്കാട്ടി.
ഭാര്യയുടെ ഹർജിയിൽ വിവാഹമോചനം അനുവദിച്ചുകൊണ്ടുള്ള കുടുംബ കോടതി വിധിക്കെതിരെ ഭർത്താവ് ഹൈക്കോടതിയെ സമീപിക്കുകയായിരുന്നു. ഭർത്താവിന്റെ ഹർജി തള്ളിക്കൊണ്ടുള്ള ഉത്തരവിലാണ് കോടതിയുടെ സുപ്രധാന പരാമർശങ്ങൾ വന്നിരിക്കുന്നത്.
ഭർത്താവ് തന്നെ നിരന്തരം ശാരീരികമായി പീഡിപ്പിക്കാറുണ്ടെന്നായിരുന്നു ഭാര്യയുടെ മൊഴി. ഭാര്യ തന്റെ സങ്കൽപ്പത്തിലുള്ള സുന്ദരിയല്ലെന്നും മറ്റ് സ്ത്രീകളുമായി താരതമ്യം ചെയ്യുമ്പോൾ താൻ നിരാശനാണെന്നും ഭർത്താവ് നിരന്തരം അധിക്ഷേപിക്കാറുണ്ടെന്നാണ് മൊഴി. പുരുഷ സുഹൃത്തുക്കളിൽ നിന്ന് ഫോണിൽ സന്ദേശങ്ങൾ വന്നാൽ ഭർത്താവിന് ഭയങ്കരമായ അസൂയ ആണെന്നും ഭാര്യയുടെ മൊഴിയിൽ പറയുന്നു. ഇതെല്ലാം മാനസിക ക്രൂരതയാണെന്നും വിവാഹമോചനത്തിന് മതിയായ കാരണങ്ങളാണെന്നും കോടതി വിലയിരുത്തുകയായിരുന്നു.
വിവാഹ ബന്ധം സാധിക്കുന്നിടത്തോളം നിലനിർത്തണമെന്നാണ് സമൂഹം താൽപര്യപ്പെടുന്നത്. എന്നാൽ ദുരിതം അവസാനമില്ലാതെ തുടരുന്നതിന് നേരെ കണ്ണടക്കാൻ നിയമത്തിനാവില്ലെന്നും കോടതി വ്യക്തമാക്കി.
