ദോഹ ഹോർട്ടികൾച്ചറൽ എക്സ്പോയുടെ പൂർണ്ണ വിവരങ്ങൾ ഉൾപ്പെടുത്തിയ ഗൈഡ് പുറത്തിറക്കി. അമീർ ഷെയ്ഖ് തമീം ബിൻ ഹമദ് അൽതാനിയുടെ സന്ദേശത്തോടെയാണ് ഗൈഡ് ആരംഭിക്കുന്നത്. എക്സ്പോയിലെത്തുന്ന സന്ദർശകർക്ക് ഓരോ വേദികളിലേക്കുമെത്താനുള്ള ലൊക്കേഷൻ മാപ്പ് ഉൾപ്പെടെയുള്ള വിവരങ്ങളാണ് ഗൈഡിൽ ഉൾപ്പെടുത്തിയിരിക്കുന്നത്.
എക്സ്പോയുടെ വീക്ഷണം, മൂല്യങ്ങൾ, പ്രമേയങ്ങളുടെ സവിശേഷത, എക്സ്പോ വേദിയിലെ കൾച്ചറൽ – ഇന്റർനാഷണൽ – ഫാമിലി എന്നിങ്ങനെയുള്ള 3 പ്രധാന സോണുകളെക്കുറിച്ചുള്ള പൂർണ്ണ വിവരങ്ങളും ഗൈഡിലുണ്ട്. ഗൈഡ് ആവശ്യമുള്ളവർക്ക് എക്സ്പോ വെബ്സൈറ്റിൽ ഡിജിറ്റൽ പതിപ്പും ലഭ്യമാക്കിയിട്ടുണ്ട്. ഒക്ടോബർ 2 മുതൽ 2024 മാർച്ച് 28 വരെ അൽബിദ പാർക്കിലാണ് രാജ്യാന്തര ഹോർട്ടികൾച്ചറൽ എക്സ്പോ സംഘടിപ്പിക്കുന്നത്. ഹരിത മരുഭൂമി, മികച്ച പരിസ്ഥിതി എന്ന പ്രമേയത്തിലാണ് ഈ വർഷത്തെ ദോഹ എക്സ്പോ നടത്തപ്പെടുന്നത്.
