കുവൈറ്റിൽ അറസ്റ്റിലായ 19 മലയാളികള്‍ ഉള്‍പ്പെട്ട 34 ഇന്ത്യക്കാരായ നഴ്‌സുമാരെ മോചിപ്പിക്കുന്നതിനുള്ള നടപടികള്‍ പുരോഗമിക്കുകയാണെന്ന് വിദേശകാര്യ സഹമന്ത്രി വി.മുരളീധരന്‍ അറിയിച്ചു. ഇതുമായി ബന്ധപ്പെട്ട് വിദേശകാര്യ മന്ത്രാലയവും ഇന്ത്യന്‍ എംബസിയും അധികാരികളുമായി സംസാരിച്ചു വരികയാണെന്നും അദ്ദേഹം കൂട്ടിച്ചേർത്തു.
അതേസമയം നിലവിൽ ആശങ്കപ്പെടേണ്ട സാഹചര്യം ഇല്ലെന്നും കൈക്കുഞ്ഞുങ്ങള്‍ ഉള്ള നഴ്സുമാർക്ക് അവരെ കാണാനും മുലയൂട്ടാനും ഉള്ള അനുമതി നല്‍കിയിട്ടുണ്ടെന്നും മന്ത്രി അറിയിച്ചു. മുലയൂട്ടുന്ന അമ്മമാരായ അഞ്ച് മലയാളി നഴ്സുമാർ അറസ്റ്റിലായവരിലുണ്ട്. താമസ നിയമം ലംഘിച്ച് ജോലി ചെയ്തെന്ന പേരില്‍ പിടിക്കപ്പെട്ട 60 അംഗ സംഘത്തില്‍ 34 ഇന്ത്യക്കാര്‍ ആണ് ഉള്ളതെന്നും മന്ത്രി കൂട്ടിച്ചേര്‍ത്തു.
കുവൈറ്റ് മാനവശേഷി സമിതിയുടെ പരിശോധനയിലാണു താമസനിയമം ലംഘിച്ചു ജോലി ചെയ്തെന്ന പേരിൽ ഇന്ത്യക്കാർ ഉൾപ്പെടെ 60 പേർ പിടിയിലായത്. ലൈസൻസ് ഇല്ലാത്തവരും മതിയായ യോഗ്യത ഇല്ലാത്തവരുമാണ് അറസ്റ്റിലായതെന്നാണു കുവൈത്ത് ആഭ്യന്തര മന്ത്രാലയം വ്യക്തമാക്കുന്നത്.
എന്നാൽ പിടിയിലായ മലയാളി നഴ്സുമാരെല്ലാം സ്ഥാപനത്തിൽ നിയമാനുസൃതമായി ജോലി ചെയ്തിരുന്നവരാണ് എന്നാണ് ബന്ധുക്കൾ പറയുന്നത്. തടവിലാക്കപ്പെട്ട ഇവർക്ക്‌ കാലാവധിയുള്ള വീസയും സ്ഥാപനത്തിന്റെ സ്പോൺസർഷിപ്പും ഉണ്ട്. പലരും മൂന്ന് മുതൽ 10 വർഷം വരെയായി ഇതേ ആശുപത്രിയിൽ ജോലി ചെയ്യുന്നവരാണെന്നും അവർ വ്യക്തമാക്കി. ഇന്ത്യയ്ക്കു പുറമേ ഫിലിപ്പീൻസ്, ഈജിപ്ത്, ഇറാൻ എന്നീ രാജ്യങ്ങളിൽ നിന്നുള്ളവരാണ് തടവിലാക്കപ്പെട്ട മറ്റ് നഴ്സുമാർ.
ഇറാൻ സ്വദേശിയുടെ ഉടമസ്ഥതയിലുള്ള ആശുപത്രിയിലാണ് ഇവർ ജോലി ചെയ്തിരുന്നത്. എന്നാൽ നല്ല രീതിയിൽ പ്രവർത്തിച്ച് വരികയായിരുന്ന ആശുപത്രിയിൽ അടുത്തിടെ സ്പോൺസറും ആശുപത്രിയുടെ ഉടമയും തമ്മിൽ തർക്കമുണ്ടായി. ഇതാണ് അറസ്റ്റിലേക്കു നയിച്ചത് എന്നാണ് ബന്ധുക്കൾക്കു ലഭിച്ച വിവരം.
Government trying to release nurses arrested in Kuwait V Muraleedharan
