കുവൈത്തിലെ സര്‍ക്കാര്‍ ജീവനക്കാരുടെ ജോലി സമയത്തിൽ മാറ്റം വരുത്താനൊരുങ്ങി മന്ത്രാലയം. ആഭ്യന്തര മന്ത്രാലയത്തിന്റെ നിർദ്ദേശത്തിന് സിവിൽ സർവീസ് കൗൺസിൽ അംഗീകാരം നൽകിയതോടെയാണ് പ്രവൃത്തി സമയം മാറ്റാൻ തീരുമാനമായത്. പുതിയ നിർദേശമനുസരിച്ച് രാവിലെ ഏഴ് മണിക്കും ഒമ്പത് മണിക്കും ഇടയിൽ ഓഫീസുകൾ ആരംഭിക്കും. തുടർന്ന് ഔദ്യോഗിക പ്രവൃത്തി സമയം പൂർത്തിയാക്കുന്നതിന് അനുസരിച്ച് ഉച്ചക്ക് ഒന്നര മുതൽ വൈകിട്ട് മൂന്നര വരെയുള്ള സമയത്ത് ജോലി അവസാനിക്കും. സർക്കാർ ജീവനക്കാർക്ക് പ്രതിദിനം ഏഴ് മണിക്കൂറാണ് പ്രവൃത്തി സമയം.
ജോലി ആരംഭിക്കുമ്പോഴും അവസാനിക്കുമ്പോഴും 30 മിനിറ്റ് ഗ്രേസ് പിരീഡും അനുവദിക്കും. ഞായറാഴ്ച മുതൽ വ്യാഴാഴ്ച വരെയാണ് കുവൈത്തിലെ പ്രവൃത്തി ദിനങ്ങൾ. പുതിയ നിയമം വരുന്നതിലൂടെ തൊഴിലാളികളുടെ ഉൽപ്പാദനക്ഷമത വർദ്ധിപ്പിക്കാനാകുമെന്നാണ് അധികൃതർ പ്രതീക്ഷിക്കുന്നത്. കൂടാതെ സമയമാറ്റം രൂക്ഷമായ ഗതാഗത പ്രശ്നത്തിന് ഒരുപരിധിവരെ പരിഹാരമാകുകയും ചെയ്യും. ഷിഫ്റ്റ് അടിസ്ഥാനത്തിൽ ജോലി ചെയ്യുന്ന സ്ഥലങ്ങളിലും, ആവശ്യ സർവീസുകളിലെ ജീവനക്കാർക്കും ജോലിയുടെ സ്വഭാവമനുസരിച്ച് സർക്കാർ കാര്യാലയങ്ങളിലെ മേധാവികൾക്ക് അനുയോജ്യമായ പ്രവൃത്തി സമയം നിർണ്ണയിക്കാമെന്ന് അധികൃതർ നിർദേശിച്ചു.
