സന്ദർശകരുടെ കുത്തൊഴുക്കിൽ ശ്വാസം മുട്ടി ദുബായിലെ ഗ്ലോബൽ വില്ലേജ്. ഗ്ലോബൽ വില്ലേജ് സീസൺ 28 ഏപ്രിൽ 28 ന് അവസാനിക്കുമെന്ന് അറിഞ്ഞതോടെയാണ് അസാധാരണമായ തിരക്ക് അനുഭവപ്പെട്ടത്. ഇതോടെ ഗ്ലോബൽ വില്ലേജ് സീസൺ 28 ഒരാഴ്ച വരെ നീട്ടുമെന്ന് പ്രഖ്യാപിച്ചിരിക്കുകയാണ് അധികൃതർ. മെയ് 5 വരെ സന്ദർശകർക്ക് ഗ്ലോബൽ വില്ലേജിലെ കാഴ്ചകളും വിനോദ പരിപാടികളും ആസ്വദിക്കാം.
250-ലധികം ഭക്ഷണശാലകൾ, 200 റൈഡുകളും, 27 പവലിയനുകളിൽ നിന്നുള്ള അതുല്യമായ ഷോപ്പിംഗ് അനുഭവങ്ങൾ, ഗെയിമുകൾ എന്നിവ ഗ്ലോബൽ വില്ലേജിൽ സന്ദർശകർക്കായി ഒരുക്കിവച്ചിട്ടുണ്ട്. മാത്രമല്ല, 12 വയസ്സിന് താഴെയുള്ള കുട്ടികളെ സൗജന്യമായി പ്രവേശിപ്പിക്കുവാൻ കുടുംബങ്ങൾക്ക് അവസരം നൽകുന്ന ‘കിഡ്‌സ് ഗോ ഫ്രീ’ ഓഫറും അടുത്തിടെ ഗ്ലോബൽ വില്ലേജ് അവതരിപ്പിച്ചിരുന്നു. ഞായർ മുതൽ ബുധൻ വരെ വൈകുന്നേരം നാല് മണി മുതൽ 12 മണി വരെയും, വ്യാഴം മുതൽ ശനി വരെ പുലർച്ചെ ഒരു മണി വരെയും ഗ്ലോബൽ വില്ലേജ് തുറന്നിരിക്കും.
