കേരളത്തിലേയ്ക്ക് പുതിയ സർവ്വീസ് ആരംഭിക്കാനൊരുങ്ങി ഇത്തിഹാദ് എയർവെയ്സ്. ക്രിസ്മസ് – പുതുവത്സര സീസണിന്റെ ഭാഗമായി നവംബർ – ജനുവരി കാലയളവിലാണ് കേരളത്തിലേയ്ക്ക് പുതിയ സർവീസുകൾ പ്രഖ്യാപിച്ചിരിക്കുന്നത്. തിരുവനന്തപുരം, കോഴിക്കോട് വിമാനത്താവളങ്ങളിൽ നിന്ന് ആഴ്ചയിൽ 7 സർവീസുകളാണ് ജനുവരി ഒന്ന് മുതൽ ആരംഭിക്കുക. കൊച്ചിയിൽ നിന്ന് നിലവിലുള്ള സർവീസുകൾ കൂടാതെ 8 സർവീസുകൾ കൂടി നവംബർ 21 മുതൽ ഇത്തിഹാദ് എയർവെയ്സ് ആരംഭിക്കും.
ക്രിസ്മസിന്റെയും പുതുവത്സരത്തിന്റെയും ഭാഗമായുണ്ടാകുന്ന തിരക്ക് കുറയ്ക്കുന്നതിന്റെ ഭാഗമായാണ് ഇത്. അടുത്തിടെ ഇത്തിഹാദ് കോഴിക്കോട്, തിരുവനന്തപുരം ഉൾപ്പെടെ 13 നഗരങ്ങളിലേക്ക് പുതിയ സർവീസുകൾ ആരംഭിച്ചിരുന്നു. ഇത്തിഹാദിന് പുറമെ ഒമാൻ എയർ, എയർ ഇന്ത്യ, ശ്രീലങ്കൻ എയർലൈൻസ്, മലേഷ്യ എയർലൈൻസ് തുടങ്ങിയവയും കേരളത്തിൽ നിന്ന് വിദേശത്തേയ്ക്ക് പുതിയ സർവീസുകൾ പ്രഖ്യാപിച്ചിട്ടുണ്ട്.
