ദുബായ് സ്‌പോർട്‌സ് സിറ്റിയിൽ റെസിഡൻഷ്യൽ ടവറിൽ തിങ്കളാഴ്ച പുലർച്ചെയോടെ തീപിടുത്തം ഉണ്ടായി. പുലർച്ചെ നാലിന് ശേഷം റിപ്പോർട്ട് ചെയ്ത തീപിടുത്തത്തിൽ ആർക്കും പരിക്കില്ല. തീപിടുത്തത്തെ തുടർന്ന് ജനങ്ങളെ ഒഴിപ്പിക്കുകയും ചെയ്തിരുന്നു.
ദുബായ് സിവിൽ ഡിഫൻസ് അറിയിച്ചതനുസരിച്ച്, അൽ ബർഷ സ്റ്റേഷനിൽ നിന്നുള്ള അഗ്നിശമന സേനാംഗങ്ങൾ ആറ് മിനിറ്റിനുള്ളിൽ സ്ഥലത്തെത്തി വാടകക്കാരെ സുരക്ഷിതമായി ഒഴിപ്പിച്ചു.
തീ അണയ്ക്കാൻ മറ്റ് രണ്ട് ഫയർ സ്റ്റേഷനുകളിൽ നിന്നുള്ള എമർജൻസി ഉദ്യോഗസ്ഥർ സ്ഥലത്തെത്തി. പുലർച്ചെ 5.23ന് തീ നിയന്ത്രണവിധേയമാക്കുകയും ഒരു മണിക്കൂറിന് ശേഷം പൂർണമായും അണയ്ക്കുകയും ചെയ്തു. നിലവിൽ ശീതീകരണ പ്രവർത്തനങ്ങൾ നടക്കുന്നുണ്ടെന്നും അതിനുശേഷം സ്ഥലം ബന്ധപ്പെട്ട അധികാരികൾക്ക് കൈമാറുമെന്നും അഗ്നിശമനസേന അറിയിച്ചു.
