കേരളത്തിലെ കുപ്രസിദ്ധ കുറ്റവാളി ബണ്ടിചോറിനെ അനുസ്മരിപ്പിക്കുന്ന രീതിയിൽ മോഷണം നടത്തിയ യുവാവ് ദുബായിൽ പിടിയിലായി. 28 വയസ്സുളള യുവാവാണ് മദ്യലഹരിയിൽ ആഡംബര വാഹനമായ റേഞ്ച് റോവർ മോഷ്ടിച്ച് കടന്നുകളഞ്ഞത്. ഏഷ്യൻ യുവതി താമസസ്ഥലത്തിന് സമീപം പാർക്കിംഗ് കേന്ദ്രത്തിൽ നിർത്തിയിട്ടിരുന്ന കാറുമായി യുവാവ് കടന്നുകളയുകയായിരുന്നു.
എന്നാൽ മോഷ്ടിച്ച കാർ മറ്റൊരു വാഹനത്തിൽ ഇടിച്ചതോടെ പൊലീസ് സ്റ്റേഷനിൽ നിന്ന് യുവതിയ്ക്ക് വിളിയെത്തി. ഇതോടെയാണ് തൻ്റെ കാർ മോഷണം പോയെന്ന് യുവതി അറിയുന്നത്. പിന്നാലെ വാഹനം നഷ്ടപ്പെട്ടെന്ന് ചൂണ്ടിക്കാട്ടി യുവതിയും പരാതി നൽകി.
മോഷ്ടിച്ച് അപകടമുണ്ടാക്കിയ വാഹനം ഇതിനകം പൊലീസ് പിടിച്ചെടുത്തിരുന്നു. മദ്യപിച്ച് വാഹനമോടിച്ച യുവാവ് തന്നെയാണ് റേഞ്ച് റോവർ കടത്തിക്കൊണ്ടുപോയതെന്നും പൊലീസ് കണ്ടെത്തി. അന്വേഷണ സംഘം യുവതിയുടെ മൊഴി പരിഗണിക്കുകയും പാർക്കിംഗ് സ്ഥലത്തെ നിരീക്ഷണ ക്യാമറകൾ പരിശോധിക്കുകയും ചെയ്തതായി പോലീസ് പറഞ്ഞു.
മദ്യപിച്ച് പരിസരത്ത് ചുറ്റിക്കറങ്ങുന്നതിനിടെ ലോക്ക് ചെയ്യാത്ത റേഞ്ച് റോവർ കണ്ടതായി ചോദ്യം ചെയ്യലിൽ മോഷ്ടാവും സമ്മതിച്ചു. അപകടമുണ്ടാക്കിയ ശേഷം കാർ ഉപേക്ഷിച്ച് രക്ഷപെടാനുളള ശ്രമത്തിനിടെയാണ് ഇയാൾ പൊലീസ് പിടിയിലായത്. ദുബായിലെ മിസ്‌ഡീമെനേഴ്‌സ് ആൻഡ് വയലേഷൻസ് കോടതിയിൽ ഹാജരാക്കിയ പ്രതിക്ക് 4000 ദിർഹം പിഴ ചുമത്തിയിട്ടുണ്ട്.
