ലോകകപ്പ് കിരീടവും കൊണ്ട് മടങ്ങാനെത്തിയ അര്‍ജൻ്റീനയുടെ ആദ്യ മല്‍സരം ഇന്ന്. സൗദി അറേബ്യയുമായാണ് മത്സരം. ലുസെയ്ല്‍ സ്റ്റേഡിയത്തില്‍ ഇന്ത്യന്‍ സമയം വൈകിട്ട് 3.30നാണ് കളിക്കുക.
ഡിസംബര്‍ 18ന് ലുസെയ്ല്‍ സ്റ്റേഡിയത്തില്‍ മെസി കിരീടമുയര്‍ത്തുമെന്ന ആഗ്രഹത്തോടെയാണ് എല്ലാ മെസി ആരാധകരും ഇന്നത്തെ മത്സരം കണ്ടുതുടങ്ങുക. ബ്രസീലിനെ തോല്‍പിച്ച് കോപ്പാ അമേരിക്ക കിരീടവും യൂറോ ചാംപ്യന്‍മാരായ ഇറ്റലിയെ തോല്‍പ്പിച്ച് ഫൈനലിസിമ കിരീടവുമൊക്കെ സ്വന്തമാക്കിയ ആത്മവിശ്വാസത്തിലാണ് അർജൻ്റീനയുടെ വരവ്.കഴിഞ്ഞ 36 കളികളിലും തോൽക്കാതിരുന്ന റെക്കൊര്‍ഡ് തുടരാന്‍ തന്നെയാണ് അര്‍ജൻ്റീനയുടെ ശ്രമം.
സൗദിയാകട്ടെ ഏത് വമ്പൻ ടീമിനോടും ഒന്ന് പൊരുതാനുറച്ചാണ് ഖത്തറിലെത്തിയിരിക്കുന്നത്. ഓസ്ട്രേലിയ, ജപ്പാന്‍ എന്നീ ടീമുകളുള്ള ഗ്രൂപ്പില്‍ ജേതാക്കളായി തന്നെയാണ് സൗദിയുടെ ഗ്രൂപ്പ് പ്രവേശനം. 10 ലോകകപ്പ് ക്വാളിഫയര്‍ മല്‍സരങ്ങളില്‍ നിന്ന് നേടിയത് 12 ഗോളുകളാണ്. ഗോളി മുഹമ്മദ് അല്‍ ഒവയ്സിലാണ് ടീമിൻ്റെ പ്രതീക്ഷ.
അതേസമയം ഇന്നലെ നടന്ന മത്സരത്തിൽ ഇരട്ടഗോളിൽ സെനഗളിനെ തളച്ച് നെതർലാൻഡ്സ് ജയിച്ചുകയറി.
അടുത്ത ആവേശപ്പോരാട്ടത്തിൽ യുഎസ്എ-വെയിൽസ് പോരാട്ടം സമനിലയിലാണ് പിരിഞ്ഞത്. സ്കോർ 1-1.
