ഉയർന്ന ശമ്പളം, ഗവേഷണപ്രബന്ധത്തിലെ പിഴവുകൾ എന്നീ വിവാദങ്ങൾക്ക് പിന്നാലെ സംസ്ഥാന യുവജന കമ്മീഷൻ അധ്യക്ഷ ചിന്ത ജെറോമിൻ്റെ പേരിൽ വിവാദം. രണ്ടു വർഷത്തോളമായി ചിന്ത കൊല്ലം നഗരത്തിലെ തീരദേശ റിസോർട്ടിലാണ് താമസമെന്നാണ് പുതിയ വിവാദം. സംഭവം അന്വേഷിക്കണമെന്നാവശ്യപ്പെട്ടു യൂത്ത് കോൺഗ്രസ് സംസ്ഥാന സെക്രട്ടറി വിഷ്ണു സുനിൽ പന്തളം വിജിലൻസിന് പരാതി നൽകി.
സീസൺ സമയത്ത് 8500 രൂപ വരെ ഒരു ദിവസം വാടകയുള്ള 3 ബെഡ്റൂം അപ്പാർട്മെൻ്റിന് സാധാരണ ദിവസങ്ങളിൽ 5500 രൂപയും 18% ജി എസ്ടിയും ഉൾപ്പെടെ പ്രതിദിനം 6490 രൂപയാണ് ഈടാക്കുകയെന്ന് യൂത്ത് കോൺഗ്രസ് പരാതിയിൽ ചൂണ്ടിക്കാട്ടുന്നു. അങ്ങനെയെങ്കിൽ ഒന്നേമുക്കാൽ വർഷമായി 38 ലക്ഷം രൂപയാണ് റിസോർട്ടിനു ചിന്ത നൽകേണ്ട തുക. ഇത്രയും തുക എവിടെനിന്നു നൽകിയെന്ന് അന്വേഷിക്കണമെന്നാണ് പരാതിയിലെ ആവശ്യം.
അമ്മയുടെ ആയുർവേദ ചികിത്സയ്ക്കാണ് റിസോർട്ടിലെ 3 ബെഡ് റൂം അപ്പാർട്മെൻ്റിൽ താമസിച്ചതെന്ന് ചിന്ത ജെറോം പ്രതികരിച്ചു. ചികിത്സയ്ക്കു ശേഷം മാസങ്ങൾക്കു മുൻപ് സ്വന്തം വീട്ടിലേക്കു താമസം മാറിയെന്നും ചിന്ത പറഞ്ഞു.
