മുകേഷ് അംബാനി – നിത അംബാനി ദമ്പതികളുടെ മകൻ അനന്തിന്റെ വിവാഹത്തെ രൂക്ഷമായി വിമർശിച്ച് സംവിധായകൻ അനുരാഗ് കശ്യപിൻ്റെ മകളും ഇൻഫ്ലുവൻസറുമായ ആലിയ കശ്യപ്. അംബാനി കുടുംബത്തിലെ വിവാഹാഘോഷം വെറും ‘സർക്കസ്’ ആണെന്നും ഇത്രയേറെ സെലിബ്രിറ്റികളെ ക്ഷണിച്ചിരിക്കുന്നത് പി.ആർ വർക്കിന് വേണ്ടിയാണെന്നും ആലിയ ആരോപിച്ചു. ആത്മാഭിമാനം ഉള്ളതുകൊണ്ട് വിവാഹത്തിൽ പങ്കെടുക്കില്ലെന്നും ആലിയ വ്യക്തമാക്കി.
ഇൻസ്റ്റഗ്രാം ബ്രോഡ്‌കാസ്‌റ്റ് ചാനലിലൂടെയാണ് അംബാനി കല്യാണത്തിനെതിരെ ആലിയ തുറന്നടിച്ചത്. ‘ചില ചടങ്ങുകളിൽ പങ്കെടുക്കാൻ എന്നെ ക്ഷണിച്ചത് അവർ പിആർ വർക്ക് ചെയ്യുന്നത് കൊണ്ടാണെന്ന് തോന്നുന്നു. (എന്തിനാണെന്ന് എന്നോട് ചോദിക്കരുത്). എന്നാൽ ഒരാളുടെ വിവാഹത്തിന് എന്നെ വിൽക്കുന്നതിനേക്കാൾ അൽപ്പം കൂടുതൽ ആത്മാഭിമാനം എനിക്കുണ്ടെന്ന് വിശ്വസിക്കാൻ ആഗ്രഹിക്കുന്നതിനാൽ ഞാൻ ഇല്ല’ എന്നാണ് ആലിയ പറഞ്ഞത്.
ജൂലൈ 12നാണ് അനന്ത് അംബാനിയുടെയും എൻകോർ ഹെൽത്ത് കെയർ ഉടമ വിരേൻ മെർച്ചന്റിന്റെയും ഷൈല വിരേൻ മെർച്ചൻ്റിൻ്റെയും മകൾ രാധികയുടെയും വിവാഹം. വിവാഹത്തോട് അനുബന്ധിച്ച് വിവിധ ആഘോഷ പരിപാടികളാണ് ദിവസേന നടത്തിവരുന്നത്. നിരവധി സെലിബ്രിറ്റികളാണ് ഓരോ പരിപാടികൾക്കും പങ്കെടുക്കുന്നത്.
