ഷാർജ രാജ്യാന്തര പുസ്തകമേളയിൽ പ്രദർശിപ്പിച്ചിരിക്കുന്ന അപൂർവ്വ കയ്യെഴുത്ത് പ്രതികൾ ശ്രദ്ധേയമാകുന്നു. വിശുദ്ധ ഖുർആൻ, ആൽഫ് ലൈലാ വാ ലൈല (ആയിരത്തൊന്ന് രാവുകൾ) എന്നിങ്ങനെ ലക്ഷങ്ങൾ വിലവരുന്ന കയ്യെഴുത്ത് പ്രതികളാണ് പ്രദർശനത്തിലുളളത്. പഴയ ഗൾഫ് ഭരണാധികാരികളുടെ അപൂർവ്വ ചിത്രങ്ങളടങ്ങിയ പുസ്തകവും കൂട്ടത്തിലുണ്ട്.
25 ലക്ഷം ദിർഹം വിലമതിക്കുന്ന ശേഖരങ്ങൾ ഷാർജ പുസ്തകോത്സവ നഗരിയിലെത്തുന്നവരെ ആകർഷിക്കും. യുഎഇ ആസ്ഥാനമായുള്ള ഇക്യു ടിഎൻഎ, ഓസ്ട്രിയൻ ആൻ്റിക്വേറിയറ്റ് ഇൻലിബ്രിസ്, ഡച്ച് ആൻ്റിക്വേറിയറ്റ് ഫോറം എന്നി മൂന്ന് കമ്പനികളുടെ ഉടമസ്ഥതയിലുള്ള ശേഖരങ്ങളാണിത്.
1608-ൽ തുർക്കിയിൽ തയ്യാറാക്കിയ “ആയിരത്തൊന്ന് രാവുകൾ’എന്ന പുസ്തകത്തിൻ്റെ കയ്യെഴുത്ത് പ്രതിയാണ് കൂട്ടത്തിൽ ഏറെ ആകർഷകം. പുസ്തകത്തിൻ്റെ ഏറ്റവും പഴയ മൂന്നാമത്തെ പതിപ്പാണിതെന്ന് ബ്ലൂപ്രിന്റുകളുടെയും അപൂർവ രേഖകളുടെയും പ്രമുഖ വ്യാപാരിയായ യാസർ റാദ് അൽ തമീമി വ്യക്തമാക്കി.
1975-ൽ യുഎഇ വൈസ് പ്രസിഡൻ്റും പ്രധാനമന്ത്രിയും ദുബൈ ഭരണാധികാരിയിരുന്ന ഷെയ്ഖ് മുഹമ്മദ് ബിൻ റാഷിദ് ഇറാഖ് സന്ദർശനം നടത്തിയ ഫോട്ടോ ആൽബവും പ്രദർശനത്തിലുണ്ട്. ഭരണാധികാരിയുടെ ഔപചാരികവും അനൗപചാരികവുമായ നിമിഷങ്ങൾ പകർത്തുന്ന 193 ഫോട്ടോഗ്രാഫുകളാണ് ആൽബത്തിൻ്റെ പ്രത്യേകത.
