ഡൽഹി വിമാനത്താവളത്തിൽ പാരീസിലേക്കുള്ള എയർ ഇന്ത്യ വിമാനം ടേക് ഓഫ്‌ ചെയ്തതിന് ശേഷം അടിയന്തരമായി തിരിച്ചിറക്കി. വിമാനത്തിന്റെ ടയറിന്റെ അവശിഷ്ടങ്ങൾ റൺവേയിൽ കണ്ടെത്തിയതിനെ തുടർന്നായിരുന്നു പറന്നുയർന്ന ഉടൻ തന്നെ വിമാനം നിലത്തിറക്കിയത്.
പാരീസിലേക്ക് പുറപ്പെട്ട എയർ ഇന്ത്യയുടെ AI 143 എന്ന വിമാനമാണ് ഡൽഹി വിമാനത്താവളത്തിൽ തിരിച്ചിറക്കിയത്. ഇന്ന് ഉച്ചയ്ക്ക് 2.28 നായിരുന്നു സംഭവം. എയർ ട്രാഫിക് കൺട്രോളർമാർ റൺവേയിൽ ടയർ അവശിഷ്ടങ്ങൾ കണ്ടെത്തിയ വിവരം ഉടൻ തന്നെ വിമാന ജീവനക്കാരെ അറിയിക്കുകയുമായിരുന്നു. എല്ലാ യാത്രക്കാരും സുരക്ഷിതരാണെന്ന് ഔദ്യോഗിക വൃത്തങ്ങൾ അറിയിച്ചു.
അതേസമയം വിമാനം ഡൽഹിയിൽ പരിശോധനയ്ക്ക് വിധേയമാക്കിയിട്ടുണ്ട്. കൂടാതെ AI143 വിമാനത്തിലെ യാത്രക്കാർക്ക് ലക്ഷ്യസ്ഥാനത്ത് എത്താനുള്ള ക്രമീകരണങ്ങൾ ചെയ്തു വരികയാണെന്നും എയർലൈൻസ് അധികൃതർ അറിയിച്ചു.
