എയർഇന്ത്യ എക്സ്പ്രസ്സ് വൈകുന്നത് തുടരുന്നു. ചൊവ്വാഴ്ച ഉച്ചയ്ക്ക് ഒരു മണിക്ക് മസ്കറ്റിൽ നിന്ന് കോഴിക്കോടേക്ക് പുറപ്പെടേണ്ട വിമാനം പറന്നത് രാത്രി 11.45നാണ്. സ്ത്രീകളും കുട്ടികളും അടക്കമുള്ള നിരവധി യാത്രക്കാരാണ് ഇതുമൂലം മണിക്കൂറുകളോളം വിമാനത്താവളത്തിൽ കുടുങ്ങിയത്.
ഒരു മണിക്ക് പുറപ്പെടേണ്ട വിമാനം വൈകുമെന്നും 4.20ന് പുറപ്പെടുമെന്നുമായിരുന്നു ആദ്യം യാത്രക്കാർക്ക് അറിയിപ്പ് ലഭിച്ചത്. ഇത് പ്രകാരം വിമാനത്താവളത്തിൽ എത്തിയ യാത്രക്കാരോട് രാത്രി 10.20ന് മാത്രമേ പുറപ്പെടാനാവൂ എന്ന് പിന്നീട് തിരുത്തി പറഞ്ഞു. ഇതനുസരിച്ച് കാത്തിരുന്നെങ്കിലും വീണ്ടും വൈകുകയും 11.45ന് അവസാനം വിമാനം പുറപ്പെടുകയും ചെയ്തു.
അതേസമയം സമാനമായ രീതിയിൽ കഴിഞ്ഞ ശനിയാഴ്ച കണ്ണൂരിലേക്ക് പോകേണ്ട എയർഇന്ത്യ എക്സ്പ്രസ് വിമാനവും 12മണിക്കൂർ വൈകിയിരുന്നു. അതിന് മുൻപത്തെ ആഴ്ചയിൽ തിരുവനന്തപുരം, കോഴിക്കോട് വിമാനങ്ങളും വൈകിയിരുന്നു. തുടർച്ചയായ വൈകലിൽ യാത്രക്കാർക്കിടയിൽ വലിയ പ്രതിഷേധം ശക്തമാണ്.
