കോഴിക്കോട് നിന്നും ദുബൈയിലേക്കുള്ള എയർ ഇന്ത്യ എക്സ്പ്രസ് വിമാനം വൈകുന്നതിൽ പ്രതിഷേധം.ശനിയാഴ്ച്ച രാത്രി 8.05ന് പുറപ്പടേണ്ട ഐ.എക്സ് 343 വിമാനമാണ് വൈകിയത്. വിമാനം നാല് മണിക്കൂറിലധികം വൈകിയതോടെ യാത്രക്കാർ വിമാനത്താവളത്തിൽ പ്രതിഷേധം രേഖപ്പെടുത്തുകയായിരുന്നു. സാങ്കേതിക തകരാറാണ് വിമാനം പുറപ്പെടാൻ വൈകുന്നതിന് കാരണമായി കമ്പനി അറിയിച്ചത്.
യാത്രക്കാരുടെ പരിശോധ നടപടികളെല്ലാം പൂർത്തിയാക്കിയ ശേഷമാണ് വിമാനം വൈകുന്ന കാര്യം ജീവനക്കാർ അറിയിച്ചത്. പ്രതിഷേധം ശക്തമായതോടെ മറ്റൊരു വിമാനം എത്തിച്ച് 12 മണിയോടെ പുറപ്പെടുമെന്നും കമ്പനി അറിയിച്ചു.
എന്നാൽ കുട്ടികളും സ്ത്രീകളും ഉൾപ്പെടെയുളള യാത്രക്കാർക്ക് മതിയായ സൌകര്യം ഏർപ്പെടുത്തുന്നതിനോ കുടിവെള്ളമെത്തിക്കുന്നതിനോ പോലും വിമാന അധികൃതർ തയ്യാറായില്ലെന്നാണ് യാത്രക്കാരുടെ പരാതി. അതേസമയം കഴിഞ്ഞ ദിവസവും സമാന സംഭവം ഉണ്ടായെന്നും കോഴിക്കോട് -ദുബൈ വിമാനം 21 മണിക്കൂർ വൈകിയെന്നുമാണ് യാത്രക്കാരുടെ ആരോപണം.
