ഇനി ദുബായ് – അബുദാബി യാത്ര അരമണിക്കൂറിൽ സാധ്യമാകും. ചെറു വിമാനങ്ങൾക്ക് കുത്തനെ പറന്നുയരാനുള്ള ലാൻഡിങ്, ടേക്ക് ഓഫ് സംവിധാനമായ വെർട്ടിപോർട്ടിന് ജനറൽ സിവിൽ ഏവിയേഷൻ അതോറിറ്റി (ജിസിഎഎ) അനുമതി നൽകി. റോഡ് മാർഗം ദുബായിൽ നിന്ന് അബുദാബിയിലെത്താൻ ഒന്നര മണിക്കൂറെങ്കിലും വേണം. ഈ 139 കിലോമീറ്റർ യാത്രയ്ക്ക് ‘പറക്കും ടാക്സി’യിൽ മൂന്നിലൊന്ന് സമയം മതി.
അതേസമയം, ഹ്രസ്വദൂര യാത്രയ്ക്ക് അഞ്ച് പേർക്ക് വരെ ഉപയോഗിക്കാവുന്ന ചെറുവിമാനമാണിത്. 2026-ൽ വെർട്ടിപോർട്ട് നിലവിൽ വരുന്നതോടെ ഇത്തരം എയർ ടാക്സി സർവീസ് വ്യാപകമാകുമെന്നാണ് സൂചന. അതോടെ ഓഫിസ്, മെട്രോ സ്റ്റേഷൻ, വിമാനത്താവളം എന്നിവിടങ്ങളിലേക്കു ഗതാഗതക്കുരുക്കിൽ പെടാതെ ജനങ്ങൾക്ക് അതിവേഗം എത്താൻ സാധിക്കും. ചാർജ് ചെയ്ത് ഉപയോഗിക്കാവുന്ന ബാറ്ററിയിലാണ് ഇത്തരം വിമാനങ്ങൾ പ്രവർത്തിക്കുന്നത്.
അബുദാബിയിൽ പ്രധാന ബിസിനസ്, ടൂറിസം കേന്ദ്രങ്ങൾ കേന്ദ്രീകരിച്ചായിരിക്കും സേവനം ലഭ്യമാവുക. മാത്രമല്ല, 2026 അവസാനത്തോടെ ഇന്റർസിറ്റി സേവനവും തുടങ്ങിയേക്കും. യുഎസ് ആസ്ഥാനമായുള്ള ജോബി ഏവിയേഷൻ കമ്പനിയാണ് എയർക്രാഫ്റ്റ് വികസിപ്പിക്കുന്നത്.
