എണ്ണ ഇതര വിദേശ വ്യാപാരത്തിൽ വീണ്ടും നേട്ടം കൊയ്ത് അബുദാബി. എമിറേറ്റിന്റെ കഴിഞ്ഞ വർഷത്തെ വ്യാപാരത്തിൽ 8 ശതമാനത്തിന്റെ വളർച്ചയാണ് രേഖപ്പെടുത്തിയിരിക്കുന്നത്. അബുദാബി കസ്റ്റംസ് ആണ് ഇത് സംബന്ധിച്ച കണക്കുകൾ പുറത്തുവിട്ടത്.
2022-ലെ കണക്കുകളുമായി താരതമ്യം ചെയ്യുമ്പോൾ എണ്ണ ഇതര വിദേശ വ്യാപാരത്തിൽ അബുദാബി വലിയ വളർച്ചയാണ് നേടിയിരിക്കുന്നത്. ഏകദേശം 281.9 ബില്യൺ ദിർഹത്തിന്റെ വ്യാപാരമാണ് എമിറേറ്റ് 2023-ൽ നടത്തിയിരിക്കുന്നത്. 2022-ൽ 260.4 ബില്യൺ ദിർഹം ആയിരുന്നതാണ് ഒരു വർഷത്തിന് ശേഷം കുതിച്ചുയർന്നത്. ഇറക്കുമതിയുടെ കാര്യത്തിലും അബുദാബി വലിയ വളർച്ച സ്വന്തമാക്കിയിരുന്നു.
2023-ൽ 136.4 ബില്യൺ ദിർഹത്തിന്റെ ഇറക്കുമതിയാണ് അബുദാബിയിൽ നടന്നത്. 2022-ൽ ഇത് 114.3 ബില്യൺ ദിർഹം ആയിരുന്നു. 19 ശതമാനത്തിന്റെ വളർച്ചയാണ് ഒരു വർഷത്തിനുള്ളിൽ രേഖപ്പെടുത്തിയത്. എമിറേറ്റിലേക്ക് ഇറക്കുമതി ചെയ്ത ശേഷം പിന്നീട് പുറത്തേക്ക് കയറ്റുമതി ചെയ്യുന്നതിൽ 11 ശതമാനത്തിന്റെ വളർച്ചയാണ് ഉണ്ടായിരിക്കുന്നത്. 2022-ൽ 47.2 ബില്യൺ ദിർഹമായിരുന്നത് 2023-ൽ 52.4 ബില്യൺ ദിർഹമായാണ് ഉയർന്നത്.
