അപകടത്തിൽ മരണപ്പെട്ട പ്രവാസികളുടെ ഓർമ്മകൾക്ക് മുന്നിൽ കണ്ണീർ നിയന്ത്രിക്കാൻ കഴിയാതെ ബഹ്‌റൈനിലെ പ്രവാസി മലയാളികൾ. ബഹ്‌റൈനിൽ വാഹനാപകടത്തിൽ ജീവൻ നഷ്ടപ്പെട്ട യുവാക്കൾക്ക് അൽ ഹിലാൽ മാനേജമെന്റിന്‍റെ ആഭിമുഖ്യത്തിൽ ആദരാഞ്ജലികൾ അർപ്പിക്കാൻ ചേർന്ന സദസ് അക്ഷരാർഥത്തിൽ കണ്ണീർ കടലായി മാറി. സെപ്റ്റംബർ ഒന്നിനാണ് ഓണാഘോഷം കഴിഞ്ഞു മടങ്ങവേ സുമൻ, ജഗത്ത്, മഹേഷ്, ഗൈഡർ, അഖിൽ എന്നീ യുവാക്കൾ ആലിയിലുണ്ടായ വാഹനാപകടത്തിൽ മരിച്ചത്.
ബഹ്‌റൈൻ മലയാളിസമൂഹവുമായി വളരെ അടുത്ത ബന്ധം കാത്തുസൂക്ഷിച്ചിരുന്ന അൽ ഹിലാൽ ആശുപത്രിയിലെ ഈ ചെറുപ്പക്കാരായജീവനക്കാരുടെ വേർപാട് വലിയ ഞെട്ടലാണ് ഉണ്ടാക്കിയത്. കഴിഞ്ഞ ദിവസം മുഹറഖിലെ ആശുപത്രി കോമ്പൗണ്ടിൽ പ്രത്യേകം ഒരുക്കിയ അനുശോചന സദസ്സിൽ സംഘടനാ പ്രതിനിധികളും ബഹ്‌റൈന്റെ വിവിധ മേഖലകളിൽ നിന്നുള്ള നിരവധി ആളുകളുമാണ് ആദരാഞ്ജലികൾ അർപ്പിക്കാൻ എത്തിയത്.
സഹപ്രവർത്തകരുടെ വിയോഗം എല്ലാവരുടെയും ഹൃദയത്തിൽ ആഴത്തിലുള്ള മുറിവായി താങ്ങി നിൽക്കുകയാണ്. ഒടുവിൽ തങ്ങളുടെ പ്രിയപ്പെട്ടവരുടെ ചിത്രങ്ങൾക്ക് മുന്നിൽ മെഴുകുതിരികൾ കത്തിച്ചുകൊണ്ട് സഹപ്രവർത്തകർ അവർക്കുള്ള അശ്രുപൂജ ഒരുക്കി . മൗനാചരണത്തിന് ശേഷം ആരംഭിച്ച അനുശോചന സദസിൽ അൽ ഹിലാൽ മാനേജിങ് ഡയറക്ടർമാരായ ഡോ .പി എ മുഹമ്മദ്, അബ്ദുൾ ലത്തീഫ്, ഡോ. വി ടി വിനോദൻ, സി ഇ ഓ ഡോ. ശരത് ചന്ദ്രൻ എന്നിവർ പ്രസംഗിച്ചു.
