നടൻ രജനികാന്തിന്റെ മകൾ ഐശ്വര്യ രജനികാന്ത് തിരക്കഥയൊരുക്കി സംവിധാനം ചെയ്യുന്ന ഏറ്റവും പുതിയ ചിത്രത്തിലെ ക്യാരക്ടർ ലുക്ക്‌ പോസ്റ്റർ പുറത്തിറക്കി. ‘ലാൽസലാം എന്ന് പേരിട്ടിരിക്കുന്ന ചിത്രത്തിലെ രജനികാന്തിന്റെ ക്യാരക്ടർ ലുക്ക്‌ പോസ്റ്റർ ആണ് അണിയറ പ്രവർത്തകർ പുറത്തുവിട്ടത്. മൊയ്തീൻ ഭായ് എന്ന കഥാപാത്രത്തെയാണ് ചിത്രത്തിൽ നടൻ അവതരിപ്പിക്കുന്നത്. കാമിയോ റോളിലാവും നടൻ പ്രത്യക്ഷപ്പെടുക.
ഐശ്വര്യ സംവിധാനം ചെയ്യുന്ന ചിത്രത്തിൽ രജനികാന്തും ഭാഗമായേക്കുമെന്ന് നേരത്തെ തന്നെ വാർത്തകൾ പ്രചരിച്ചിരുന്നു. ഇതിന് പിന്നാലെയാണ് പോസ്റ്റർ പുറത്ത് വിട്ടത്. ‘ഏവരുടെയും പ്രിയപ്പെട്ട ഭായ് തിരികെ മുംബൈയിൽ എത്തി’ എന്ന ക്യാപ്ഷനോട് കൂടിയാണ് ലൈക്ക പ്രൊഡക്ഷൻസ് പോസ്റ്റർ പങ്കുവെച്ചിരിക്കുന്നത്. കലാപ ഭൂമിയിലൂടെ നടന്നുവരുന്ന രജനിയുടെ പോസ്റ്റർ ഇതിനോടകം തന്നെ വൈറലായി കഴിഞ്ഞു
വിഷ്ണു വിശാലും വിക്രാന്തുമാണ് ചിത്രത്തിലെ മറ്റ് നായക കഥാപാത്രങ്ങളെ അവതരിപ്പിക്കുന്നത്. ബിഗ് ബജറ്റ് ചിത്രമായ ‘ലാൽസലാം’ നിർമ്മിക്കുന്നത് ലൈക്ക പ്രൊഡക്ഷൻസിന്റെ ബാനറിൽ സുഭാസ്കരനാണ്. എ ആർ റഹ്മാനാണ് ചിത്രത്തിന്റെ സംഗീത സംവിധാനം നിർവഹിക്കുന്നത്. വിഷ്ണു രംഗസാമി ഛായാഗ്രഹണവും പ്രവീൺ എഡിറ്റിങും നിർവഹിക്കുന്നു.
