തന്റെ 90-ാം ജന്മദിനത്തിൽ ദുബായിൽ സംഗീത കച്ചേരി അവതരിപ്പിക്കാനൊരുങ്ങി ഇതിഹാസ ഗായിക ആശ ഭോസ്ലെ. ജന്മദിനമായ സെപ്റ്റംബർ എട്ടിനാണ് ‘ആശ@90 ലൈവ്’ എന്ന പേരിൽ കച്ചേരി അവതരിപ്പിക്കുക. ദുബായിലെ കൊക്കകോള അരീനയിലാണ് പരിപാടി സംഘടിപ്പിക്കപ്പെടുക.
ഇന്ത്യയിലെ ഏറ്റവും സ്വാധീനമുള്ള ഗായികമാരിൽ ഒരാളാണ് ആശ ഭോസ്ലെ. എട്ട് പതിറ്റാണ്ടിലേറെ നീണ്ട കരിയറിൽ പത്മവിഭൂഷൺ അവാർഡ് ജേതാവ് കൂടിയായ ആശ ഭോസ്ലെ വിവിധ ഭാഷകളിലെ സിനിമകളിലായി 12,000ത്തിലധികം ഗാനങ്ങളും ഇതിന് പുറമെ നിരവധി ആൽബം ഗാനങ്ങളും ആലപിച്ചിട്ടുണ്ട്. 1981, 86 വർഷങ്ങളിലായി രണ്ട് ദേശീയ ചലച്ചിത്ര പുരസ്കാരം, 18 മഹാരാഷ്ട്ര സംസ്ഥാന ചലച്ചിത്ര അവാർഡുകൾ, രണ്ട് ഗ്രാമി നോമിനേഷനുകൾ എന്നിവയുൾപ്പെടെ നിരവധി അംഗീകാരങ്ങളും നേടിയിട്ടുണ്ട്. അന്തരിച്ച പിന്നണി ഗായിക ലതാ മങ്കേഷ്കറിന്റെ സഹോദരിയാണ് ആശ ഭോസ്ലെ.
