തെലുങ്കിൽ ഹിറ്റ്‌ ആയ ”ദസറ’യ്ക്കു ശേഷം വീണ്ടും ടോളിവുഡിൽ തിളങ്ങാൻ ഷൈൻ ടോം ചാക്കോ. ജൂനിയർ എൻടിആർ നായകനാകുന്ന ബ്രഹ്മാണ്ഡ ചിത്രം ‘ദേവര’യിലാണ് ഷൈൻ ടോം ചാക്കോ പ്രധാന വേഷത്തിൽ എത്തുന്നത്. ചിത്രത്തിൽ സെയ്ഫ് അലിഖാൻ, ജാൻവി കപൂർ എന്നീ ബോളിവുഡ് താരങ്ങളും പ്രധാനവേഷങ്ങൾ അവതരിപ്പിക്കുന്നുണ്ട് . ജൂനിയർ എൻടിആറിന് പിറന്നാൾ ആശംസകൾ നേർന്നുകൊണ്ട് ഷൈൻ പങ്കുവച്ച കുറിപ്പിലാണ് തന്റെ അടുത്ത ചിത്രത്തെക്കുറിച്ച് താരം വെളിപ്പെടുത്തിയത്.
‘ദസറ’യിലെ ഷൈനിന്റെ പ്രകടനം കൊണ്ട് തെലുങ്ക് പ്രേക്ഷകരുടെ ശ്രദ്ധ പിടിച്ചു പറ്റിയിരുന്നു. ഇതിന് ശേഷം തമിഴ്, തെലുങ്ക്, കന്നഡ ഭാഷകളിൽ നിന്നായി നിറയെ ഓഫറുകളാണ് ഷൈനിന് വരുന്നത്. ‘ദേവര’യിൽ എൻടിആറിനും സെയ്ഫ് അലിഖാനുമൊപ്പം വളരെ പ്രാധാന്യമുള്ള കഥാപാത്രത്തെയാണ് ഷൈൻ അവതരിപ്പിക്കുന്നത് എന്നാണ് ചിത്രത്തിന്റെ അണിയറ പ്രവർത്തകർ പുറത്ത് വിട്ട റിപ്പോർട്ടിൽ പറയുന്നത്.
വലിയ ബഡ്ജറ്റിൽ ഒരുങ്ങുന്ന ‘ദേവര’ സംവിധാനം ചെയ്യുന്നത് കൊരട്ടാല ശിവയാണ്. യുവസുധ ആർട്ട്‌സും എന്‍ടിആര്‍ ആര്‍ട്സും ചേർന്ന് ചിത്രം നിർമിക്കുന്നു. പാൻ ഇന്ത്യൻ ചിത്രമായ ദേവര 2024 ഏപ്രിൽ അഞ്ചിനായിരിക്കും റിലീസ് ചെയ്യുക. അനിരുദ്ധ് ആണ് സംഗീത സംവിധാനം നിർവഹിക്കുന്നത്. ഛായാഗ്രാഹണം രത്നവേലു ഐഎസ്‌സി. പ്രൊഡക്‌ഷന്‍ ഡിസൈന്ർ മലയാളിയായ സാബു സിറിള്‍ ആണ് നിർവഹിക്കുന്നത്. എഡിറ്റിങ് ശ്രീകര്‍ പ്രസാദ്. സിനിമയുടെ പിന്നണിയിലും ഇന്ത്യന്‍ സിനിമയിലെ പ്രമുഖരാണ് അണിനിരക്കുന്നത്.
