പ്രേക്ഷകര്‍ ഏറെ പ്രതീക്ഷയോടെ കാത്തിരുന്ന മണിരത്നത്തിൻ്റെ ബ്രഹ്‌മാണ്ഡ ചിത്രം ‘പൊന്നിയിന്‍ സെല്‍വന്‍ 2’ ൻ്റെ ട്രെയിലര്‍ പുറത്ത്. മൂന്ന് മിനിറ്റ് ദൈര്‍ഘ്യമുള്ള ട്രെയിലറാണ് അണിയറ പ്രവര്‍ത്തകര്‍ പുറത്തുവിട്ടിരിക്കുന്നത്.
ചിത്രത്തിൻ്റെ ഔദ്യോഗിക സോഷ്യല്‍ മീഡിയ പേജില്‍ പിഎസ്2ൻ്റെ മ്യൂസിക് ലോഞ്ചിനെക്കുറിച്ചുള്ള വിശദാംശങ്ങള്‍ നേരത്തെ പങ്കുവെച്ചിരുന്നു. സംഗീതവും ഗൃഹാതുരത്വവും ചരിത്രവും ഇഴചേർന്നൊരു സായാഹ്നം പിഎസ്2 മ്യൂസിക് ലോഞ്ചില്‍ നിങ്ങളെ കാത്തിരിക്കുന്നു. ഞങ്ങള്‍ക്കൊപ്പം ചേരുക എന്നായിരുന്നു കുറിപ്പ്. ചെന്നൈ നെഹ്റു ഇന്‍ഡോര്‍ സ്റ്റേഡിയത്തിലാണ് പിഎസ് 2 ട്രെയിലര്‍ ലോഞ്ച് നടന്നത്.
1955ല്‍ ഇറങ്ങിയ കല്‍ക്കി കൃഷ്ണമൂര്‍ത്തിയുടെ നോവലിനെ ആസ്പദമാക്കിയുള്ള പൊന്നിയിന്‍ സെല്‍വൻ രണ്ടാം ഭാഗം ആരാധകര്‍ ഏറെ ആകാംക്ഷയോടെ കാത്തിരിക്കുന്ന ചിത്രമാണ്. പിഎസ്2 ഈ വര്‍ഷം ഏപ്രില്‍ 28 ന് തിയേറ്ററുകളിലെത്തും.
ലോകമെമ്പാടും വലിയ കളക്ഷന്‍ നേടിയ ചിത്രമാണ് പൊന്നിയിന്‍ സെല്‍വന്‍ ആദ്യഭാഗം. അഞ്ഞൂറ് കോടി മുതല്‍മുടക്കില്‍ എത്തിയ ഒന്നാം ഭാഗത്തിൽ സൂപ്പര്‍ താരങ്ങളായ വിക്രം, കാര്‍ത്തി, ജയം രവി, ഐശ്വര്യ റായ്, തൃഷ തുടങ്ങിയ വമ്പൻ താരനിരയാണ് പ്രത്യക്ഷപ്പെട്ടത്. മലയാളത്തിൻ്റെ പ്രിയപ്പെട്ട താരങ്ങളായ ജയറാം, ബാബു ആന്റണി, ഐശ്വര്യ ലക്ഷ്മി എന്നിവരും കേന്ദ്ര കഥാപാത്രങ്ങളെ അവതരിപ്പിക്കുന്നുണ്ട്.
