മമ്മൂട്ടി മൂന്ന് വേഷങ്ങളിലെത്തിയ ഹിറ്റ് ചിത്രമായ ‘പാലേരി മാണിക്യം’ വീണ്ടും പ്രദർശനത്തിനൊരുങ്ങുന്നു. രഞ്ജിത്ത് സംവിധാനം ചെയ്‌ത ചിത്രത്തിന്റെ 4 കെ പതിപ്പാണ് തിയേറ്ററിലേയ്ക്കെത്തുന്നത്. ഏറ്റവും പുതിയ ശബ്ദ സാങ്കേതിക മികവോടെ വീണ്ടും റിലീസിനൊരുങ്ങുന്ന ചിത്രം ഇപ്പോൾ മൂന്നാം തവണയാണ് തിയേറ്ററിലെത്തുന്നത്.
2009-ൽ സംസ്ഥാന അവാർഡുകൾ വാരിക്കൂട്ടിയ ചിത്രത്തിലെ മമ്മൂട്ടിയുടെ കഥാപാത്രങ്ങൾ സിനിമാ ലോകം വളരെ ചർച്ച ചെയ്തിരുന്നു. മൂന്ന് വ്യത്യസ്ത കഥാപാത്രങ്ങളായി തകർത്തഭിനയിച്ച മമ്മൂട്ടിയുടെ പ്രകടനം കൂടുതൽ ശബ്ദ സാങ്കേതികതയിൽ കാണുന്നതിനായി നിരവധി ആരാധകർ ഇത്തവണയുമെത്തുമെന്നാണ് അണിയറ പ്രവർത്തകരുടെ പ്രതീക്ഷ.
ചിത്രത്തിലെ മികച്ച പ്രകടനത്തിലൂടെ ആ വർഷത്തെ മികച്ച നടനുള്ള സംസ്ഥാന പുരസ്‌കാരം മമ്മൂട്ടിയും മികച്ച നടിക്കുള്ള അവാർഡ് ശ്വേത മേനോനും കരസ്ഥമാക്കിയിരുന്നു. മൈഥിലി, ശ്രീനിവാസൻ, സിദ്ദിഖ്, സുരേഷ് കൃഷ്‌ണ, മുഹമ്മദ് മുസ്‌ഫ, ശശി കലിംഗ, ടി ദാമോദരൻ, വിജയൻ വി നായർ, ഗൗരി മുഞ്ജൽ തുടങ്ങിയവരാണ് ഈ ചിത്രത്തിലെ മറ്റ് പ്രമുഖ വേഷങ്ങളെ അവതരിപ്പിച്ചത്.
