വർഷങ്ങളുടെ ഇടവേളയ്ക്കു ശേഷം മലയാളത്തിൽ പ്രതിനായക കഥാപാത്രത്തെ അവതരിപ്പിക്കാന്‍ ഒരുങ്ങി മെഗാ സ്റ്റാർ മമ്മൂട്ടി. ‘ഭൂതകാലം’ എന്ന ഹൊറർ ചിത്രം സംവിധാനം ചെയ്ത രാഹുൽ സദാശിവൻ ആണ് ഈ ചിത്രത്തിന്റെയും സംവിധായകൻ. അര്‍ജുൻ അശോകനാണ് ചിത്രത്തിൽ മറ്റൊരു പ്രധാന കഥാപാത്രത്തെ അവതരിപ്പിക്കുന്നത്. ഹൊറർ ഗണത്തിൽ പെടുന്ന സിനിമയുടെ പ്രധാന ലൊക്കേഷൻ കൊച്ചി, പാലക്കാട് എന്നിവിടങ്ങളാണ്. വരിക്കാശ്ശേരിമനയാകും ഒരു പ്രധാന ലൊക്കേഷൻ.
അതേസമയം ‘വിക്രം വേദ’ ഒരുക്കിയ തമിഴ് നിർമാതാക്കളായ വൈ നോട്ട് സ്റ്റുഡിയോസ് ആദ്യമായി നിർമിക്കുന്ന മലയാള സിനിമ എന്ന പ്രത്യേകത കൂടിയുണ്ട് ചിത്രത്തിന്. ഓഗസ്റ്റ് 15-ന് സിനിമയുടെ ചിത്രീകരണം ആരംഭിക്കും. എന്നാൽ സിനിമയുടെ പേര് ഇതുവരെ പ്രഖ്യാപിച്ചിട്ടില്ല. 30 ദിവസമാണ് ചിത്രത്തിനായി മമ്മൂട്ടി നൽ‍‍‍കിയിരിക്കുന്ന ഡേറ്റ്. അതേസമയം അര്‍‍‍‍‍ജുന്‍ അശോകന്‍ 60 ദിവസത്തെ ഡേറ്റ് ആണ് സിനിമയ്ക്കായി നൽകിയിരിക്കുന്നത്.
ഈ ചിത്രത്തിൽ മമ്മൂട്ടിയുടെ പ്രതിനായക കഥാപാത്രമാണ് സിനിമയുടെ പ്രധാന ആകർഷണം. പടയോട്ടം, വിധേയൻ, ഇനിയെങ്കിലും, പലേരി മാണിക്യം, പുഴു എന്നീ സിനിമകളിൽ മമ്മൂട്ടി നെഗറ്റിവ് ഷെയ്ഡുള്ള കഥാപാത്രമായി അഭിനയിച്ചിട്ടുണ്ട്. ‘റെഡ് റെയ്ൻ’ എന്ന സയൻസ് ഫിക്‌ഷൻ ചിത്രത്തിലൂടെ സംവിധാന രംഗത്തെത്തിയ വ്യക്തിയാണ് രാഹുൽ സദാശിവൻ.
