പൂനെ ഫിലിം ആൻഡ് ടെലിവിഷൻ ഇൻസ്റ്റിറ്റ്യൂട്ട് ഓഫ് ഇന്ത്യയുടെ (എഫ്ടിഐഐ) പുതിയ പ്രസിഡന്റും ഗവേണിങ് കൗൺസിൽ ചെയർമാനായും നടനും സംവിധായകനുമായ ആർ.മാധവനെ കേന്ദ്രസർക്കാർ നിയമിച്ചു. പ്രശസ്ത സംവിധായകൻ ശേഖർ കപൂറിന്റെ ഒഴിവിലേക്കക്കാണ് അദ്ദേഹം എത്തുന്നത്. കേന്ദ്രമന്ത്രി അനുരാഗ് ഠാക്കൂറാണ് എക്സ് പ്ലാറ്റ്ഫോമിലൂടെ (ട്വിറ്റർ) പ്രഖ്യാപനം നടത്തിയത്.
എഫ്ടിഐഐയുടെ പ്രസിഡന്റും ഗവേണിങ് കൗൺസിൽ ചെയർമാനുമായും നാമനിർദേശം ചെയ്യപ്പെട്ട മാധവൻജിക്ക് അഭിനന്ദനങ്ങൾ. താങ്കളുടെ വിപുലമായ അനുഭവ സമ്പത്തും ശക്തമായ ധാർമികതയും ഈ ഇൻസ്റ്റിറ്റ്യൂട്ടിനെ സമ്പന്നമാക്കുമെന്നും നല്ല മാറ്റങ്ങൾ കൊണ്ടുവരുമെന്നും ഉറപ്പുണ്ട്. ആശംസകൾ. എന്നാണ് അനുരാഗ് ഠാക്കൂർ കുറിച്ചത്.
അതേസമയം പ്രതീക്ഷയ്‌ക്കൊത്ത് ഉയരാൻ പരമാവധി ശ്രമിക്കുമെന്ന് കേന്ദ്രമന്ത്രിയുടെ പോസ്റ്റിനു മറുപടിയായി മാധവൻ പറഞ്ഞു. ആദരവിനും ആശംസകൾക്കും വളരെ നന്ദിയുണ്ട് എന്നും താരം കൂട്ടിച്ചേർത്തു. മാധവൻ ആദ്യമായി സംവിധാനം ചെയ്ത ‘റോക്കട്രി: ദ് നമ്പി ഇഫക്റ്റ്’ എന്ന ചിത്രം അടുത്തിടെ മികച്ച ഫീച്ചർ ഫിലിമിനുള്ള ദേശീയ അവാർഡ് സ്വന്തമാക്കിയിരുന്നു.
