മുപ്പത്തിയാറ് വര്‍ഷത്തെ ഇടവേളയ്ക്ക് ശേഷം കമല്‍ഹാസനും മണിരത്‌നവും ഒന്നിക്കുന്നു. ചിത്രത്തിന്റെ ടീസർ റിലീസ് തീയതി പ്രഖ്യാപിച്ചു. ‘കെ.എച്ച് 234’ എന്ന് താത്കാലികമായി പേരിട്ടിരിക്കുന്ന ചിത്രത്തിന്റെ ടീസർ കമൽഹാസന്റെ പിറന്നാൾ ദിനമായ നവംബർ ഏഴിനായിരിക്കും പുറത്തിറക്കുക. ഒരു ടെലിവിഷൻ പരിപാടിയ്ക്കിടെ താരം തന്നെയാണ് ഇക്കാര്യം വെളിപ്പെടുത്തിയത്.
അതേസമയം മൂന്ന് പതിറ്റാണ്ടുകള്‍ക്ക് ശേഷം ഇരുവരും ഒന്നിക്കുന്ന ചിത്രത്തില്‍ വന്‍ താരനിരയാണ് അണിനിരയ്ക്കുന്നത്. കമലിന്റെ 234-ാമത്തെ ചിത്രം കൂടിയാണിത്. തൃഷ, ദുല്‍ഖര്‍ സല്‍മാന്‍, ജയം രവി തുടങ്ങിയവര്‍ ഈ ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നുണ്ടെന്നാണ് റിപ്പോർട്ടുകൾ. മണിരത്‌നത്തോടൊപ്പമുള്ള തൃഷയുടെ മൂന്നാമത്തെ ചിത്രം കൂടിയാണിത്.
രാജ് കമല്‍ ഫിലിംസ് ഇന്റര്‍നാഷണല്‍, മദ്രാസ് ടാക്കീസ് എന്നീ ബാനറുകളില്‍ കമല്‍ ഹാസന്‍, മണിരത്‌നം, ജി മഹേന്ദ്രന്‍, ശിവ അനന്ദ് എന്നിവര്‍ ചേര്‍ന്നാണ് കെഎച്ച് 234 നിര്‍മ്മിക്കുന്നത്. അതേസമയം കമല്‍ ഹാസന്‍-ശങ്കര്‍ കൂട്ടുകെട്ടില്‍ ഇന്ത്യന്‍ 2 അണിയറയിലാണ്. മാത്രമല്ല, നാഗ് അശ്വിന്‍ സംവിധാനം ചെയ്ത് പ്രഭാസ് നായകനാവുന്ന പാന്‍ ഇന്ത്യന്‍ ചിത്രം ‘കല്‍കി 2898 എഡി’യിലും കമല്ഹാസന് ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്.
1987-ല്‍ മണിരത്‌നം സംവിധാനം ചെയ്ത ‘നായകനാ’ണ് മണിരത്‌നം- കമല്ഹാസന് കൂട്ടുകെട്ടിലെത്തിയ അവസാന ചിത്രം. ‘നായകനി’ലെ അഭിനയത്തിന് കമല്ഹാസന് മികച്ച നടനുള്ള ദേശീയ പുരസ്‌കാരവും ലഭിച്ചിരുന്നു. നവംബർ ആദ്യവാരം ചിത്രം രാജ്യത്തെ 280 കേന്ദ്രങ്ങളിൽ റീറിലീസ് ചെയ്യുന്നുണ്ട്.
