ദുബായ് ഇന്റർനാഷണൽ സിനി കാർണിവൽ പുരസ്കാരം സ്വന്തമാക്കി ‘കാക്കിപ്പട’. ഇന്റർനാഷണൽ നറേറ്റീവ് ഫീച്ചർ വിഭാഗത്തിൽ കാക്കിപ്പടയുടെ സംവിധായകൻ ഷെബി ചൗഘട്ടാണ് അവാർഡിന് അർഹനായത്. ഹൈദരാബാദിൽ നടന്ന യഥാർത്ഥ സംഭവത്തിൽ നിന്ന് പ്രചോദനമുൾക്കൊണ്ട് നിർമ്മിച്ച ചിത്രം പ്രേക്ഷകർക്കിടയിൽ മികച്ച പ്രതികരണമായിരുന്നു നേടിയത്.
ഒരു സമകാലിക വിഷയമാണ് കാക്കിപ്പട എന്ന സിനിമയിലൂടെ ചിത്രത്തിന്റെ രചയിതാവും സംവിധായകനുമായ ഷെബി ചൗഘട്ട് പറയാൻ ശ്രമിച്ചത്. കുട്ടികൾക്കെതിരായ ലൈംഗിക അതിക്രമങ്ങൾ ഉണ്ടായ സാഹചര്യത്തിൽ ഈ ചിത്രം സമൂഹ മാധ്യമങ്ങളിൽ വലിയ തോതിൽ ചർച്ച ചെയ്യപ്പെട്ടിരുന്നു. ചിത്രത്തിന്റെ രണ്ടാം ഭാഗം എത്തുമെന്നും ഇതിനോടകം പ്രഖ്യാപനമുണ്ടായിരുന്നു.
കാക്കിപ്പട മുന്നോട്ട് വെച്ച സന്ദേശവും സാമൂഹിക പ്രതിബദ്ധതയുമാണ് ഷെബി ചൗഘട്ടിനെ അവാർഡിന് അർഹനാക്കിയത്. 2022ൽ പുറത്തിറങ്ങിയ ചിത്രം മെൽബണിൽ നടക്കുന്ന ഐഎഫ്എഫ്എം 2023-ലേക്കും തിരഞ്ഞെടുക്കപ്പെട്ടിട്ടുണ്ട്.
