ഇന്ത്യൻ സിനിമയുടെ ചരിത്രത്തിലെ ഏറ്റവും വലിയ ഓപ്പണിങ് കളക്ഷൻ എന്ന നേട്ടം സ്വന്തമാക്കി അറ്റ്ലീ ചിത്രം‘ജവാൻ’. 520.79 കോടിയാണ് ചിത്രത്തിന്റെ ആദ്യ ആഴ്ചയിലെ ആഗോള കളക്ഷൻ. അണിയറ പ്രവർത്തകർ തന്നെയാണ് ഔദ്യോഗികമായി കളക്ഷൻ പുറത്തുവിട്ടത്. അതേസമയം ഇതുവരെയുള്ള കണക്കെടുത്താൽ ഒരു ഇന്ത്യൻ ചിത്രത്തിനു ആദ്യ ആഴ്ച ലഭിക്കുന്ന ഏറ്റവും വലിയ ഓപ്പണിങ് ആണ് ജവാൻ സ്വന്തമാക്കിയിരിക്കുന്നത്. ഈ വര്‍ഷം റിലീസ് ചെയ്ത പഠാന്റെ റെക്കോഡിനെയും ചിത്രം മറികടന്നു.
ഏറ്റവും വേഗത്തില്‍ 250 കോടി കടക്കുന്ന ആദ്യ ഹിന്ദി ചിത്രം കൂടിയാണ് ജവാന്‍. റിലീസ് ചെയ്ത വ്യാഴാഴ്ച 65 കോടി, വെള്ളി 46 കോടി, ശനി 68 കോടി, ഞായറാഴ്ച 71 കോടി എന്നിങ്ങനെയാണ് ഹിന്ദിയിൽ നിന്നും ചിത്രം വാരിക്കൂട്ടിയത്. കൂടാതെ തമിഴില്‍ നിന്നും തെലുങ്കിൽ നിന്നും നാല് ദിവസത്തെ കലക്‌ഷൻ 34 കോടിയാണ്.
അതേസമയം സംവിധാനം ചെയ്ത നാല് സിനിമകളും തുടർച്ചയായി നൂറ് കോടി ക്ലബ്ബിലെത്തിക്കുന്ന സംവിധായകനായി അറ്റ്ലി മാറി. ഇതിനു മുമ്പ് വിജയ്‌യെ നായകനാക്കി അറ്റ്ലി സംവിധാനം ചെയ്ത തെറി, മെർസൽ, ബിഗിൽ എന്നീ സിനിമകൾ ബോക്സ്ഓഫിസിൽ നൂറ് കോടി എന്ന നേട്ടം സ്വന്തമാക്കിയിരുന്നു.
