അയോധ്യയിലെ രാമക്ഷേത്ര പ്രതിഷ്ഠ ദിനത്തിൽ ഭരണഘടനയുടെ ആമുഖം സമൂഹ മാധ്യമങ്ങളിൽ പങ്കുവെച്ച് മലയാള സിനിമ താരങ്ങളും സംവിധായകരും. നടിമാരായ റിമ കല്ലിങ്കൽ, കനി കുസൃതി, പാർവതി തിരുവോത്ത്, ദിവ്യപ്രഭ, സംവിധായകരായ ആഷിഖ് അബു, ജിയോ ബേബി, കമൽ കെ.എം, ഗായകരായ സൂരജ് സന്തോഷ്, രശ്മി സതീഷ് തുടങ്ങിയവരാണ് സമൂഹ മാധ്യമങ്ങളിലൂടെ ഭരണഘടനയുടെ ആമുഖം പങ്കുവച്ചുകൊണ്ട് നിലപാടറിയിച്ചത്.
‘നമ്മുടെ ഇന്ത്യ’ എന്ന കുറിപ്പോടെയാണ് പാർവതി ഭരണഘടനയുടെ ആമുഖം പങ്കുവെച്ചിരിക്കുന്നത്. അതേസമയം ‘നീതി, സ്വാതന്ത്ര്യം, സമത്വം, സാഹോദര്യം’ എന്ന കുറിപ്പോടെയായിരുന്നു റിമ കല്ലിങ്കൽ ആമുഖം പോസ്റ്റ് ചെയ്തത്. ഈ പോസ്റ്റുകൾക്ക് താഴെ ‘ജയ് ശ്രീരാം’ കമന്റുകളുമായും ശ്രീരാമ വിഗ്രഹത്തിന്റെ ചിത്രങ്ങളുമായും സംഘ്പരിവാർ അണികളും രംഗത്തെത്തിയിട്ടുണ്ട്.
ഗായകൻ സൂരജ് സന്തോഷും സമൂഹ മാധ്യമങ്ങളിൽ ഭരണഘടനയുടെ ആമുഖം പങ്കുവച്ചിട്ടുണ്ട്. നേരത്തെ രാമക്ഷേത്ര പ്രതിഷ്ഠാദിനം നാമം ജപിച്ചും വിളക്ക് കൊളുത്തിയും ആചരിക്കണമെന്ന ഗായിക കെ.എസ് ചിത്രയുടെ ആഹ്വാനത്തെ വിമർശിച്ച് സൂരജ് സന്തോഷ് രംഗത്ത് വന്നിരുന്നു. ഇതിനെ തുടർന്ന് സംഘ്പരിവാറിന്റെ സൈബർ ആക്രമണത്തിനും അദ്ദേഹം ഇരയായി.
