മുൻ ഇന്ത്യൻ പ്രധാനമന്ത്രി ഇന്ദിരാഗാന്ധിയുടെ ജീവിതത്തെ ആസ്പദമാക്കിയുള്ള ചിത്രം ‘എമർജൻസി’യുടെ റിലീസിങ് ഡേറ്റ് പുറത്ത് വിട്ടു. നടി കങ്കണ റണാവത്ത് സംവിധാനം ചെയ്യുന്ന ബോളിവുഡ് ചിത്രമാണ് എമർജൻസി. ചിത്രത്തിൽ ഇന്ദിര ഗാന്ധിയായിട്ടാണ് നടി എത്തുന്നത്. 2023 നവംബർ 24 നാണ് ചിത്രം പ്രദർശനത്തിനെത്തുക. ബോളിവുഡ് നടൻ അനുപം ഖേറിന്റെ ശബ്ദ പശ്ചാത്തിലുളള ടീസറിനൊപ്പമാണ് റിലീസിങ് തീയതി പങ്കുവെച്ചിരിക്കുന്നത്. ഇത് വൈറലാവുകയും ചെയ്തിട്ടുണ്ട്.
കങ്കണ സ്വതന്ത്രമായി സംവിധാനം ചെയ്യുന്ന ചിത്രം കൂടിയാണിത്. അടിയന്തരാവസ്ഥ നടപ്പാക്കിയ 1975 ജൂൺ 25 മുതൽ 1977 മാർച്ച് 21 വരെയുള്ള കാലഘട്ടങ്ങളിലെ സംഭവങ്ങൾ ആവിഷ്കരിക്കുന്ന ചിത്രത്തിന്റെ നിർമാതാവും കങ്കണ തന്നെയാണ്. ഇന്ദിര ഗാന്ധിയുടെ രൂപത്തിലുള്ള നടിയുടെ പോസ്റ്ററുകൾ നേരത്തെ തന്നെ സോഷ്യൽ മീഡിയയിൽ വൈറലായിരുന്നു.
അതേസമയം ചിത്രത്തിന്റെ കഥയും കങ്കണ തന്നെയാണ് എഴുതിയിരിക്കുന്നത്. റിതേഷ് ഷാ ആണ് തിരക്കഥ. ജി.വി. പ്രകാശ് കുമാറാണ് ചിത്രത്തിന്റെ സംഗീത സംവിധാനം നിർവഹിക്കുന്നത്. കങ്കണയ്ക്കൊപ്പം അനുപം ഖേർ, സതീഷ് കൗശിക്, മഹിമ ചൗധരി, മിലിന്ദ് സോമൻ, ശ്രേയസ് താൽപ‍ഡ‍േ എന്നിവരും പ്രധാനകഥാപത്രങ്ങളെ അവതരിപ്പിക്കുന്നുണ്ട്.
