അവധി ദിനങ്ങൾ പ്രിയപ്പെട്ടവരോടൊപ്പം ചിലവഴിക്കാനാഗ്രഹിക്കുന്നവരാണ് നാം എല്ലാവരും. എന്നാൽ ആ പ്രിയപ്പെട്ടവർ കൂറ്റൻ പാമ്പുകളായാലോ? കാലിഫോർണിയയിലെ ഫൗണ്ടൻവാലി മൃഗശാലയിലാണ് പാമ്പുകളോടൊപ്പം പെട്ടിയിൽ സമയം ചിലവഴിക്കുന്ന ഒരു ജീവനക്കാരനുള്ളത്.
ജെയ് ബ്രൂവർ എന്ന ജീവനക്കാരനാണ് തന്റെ അവധി ദിനങ്ങൾ കൂറ്റൻ പെരുമ്പാമ്പുകൾക്കൊപ്പം ചിലവഴിക്കുനന്ത്. ഭയത്തിന്റെ ഒരു കണിക പോലും ഇല്ലാതെ സർവ്വസാധാരണമായാണ് ബ്രൂവർ പാമ്പുകളോട് ഇടപഴകുന്നത്. ഇതിന്റെ വീഡിയോ ഇതിനോടകം സമൂഹമാധ്യമങ്ങളിൽ വൈറലാകുകയും ചെയ്തു. മൂന്ന് തരത്തിലുള്ള പെരുമ്പാമ്പുകൾ ബ്രൂവറിനെ ചുറ്റിവരിയുന്നത് ദൃശ്യങ്ങളിൽ കാണാൻ സാധിക്കും.
മഞ്ഞയും വെള്ളയും കലർന്ന നിറത്തിലുള്ള പാമ്പ് ബ്രൂവറിന്റെ തോളിൽ ഇഴഞ്ഞു കയറുകയും പെട്ടിക്ക് പുറത്തേക്ക് പോകാൻ ശ്രമിക്കുകയും ചെയ്യുന്നു. മറ്റ് രണ്ട് പാമ്പുകൾ ജീവനക്കാരന്റെ കാലിലാണ് ചുറ്റികിടക്കുന്നത്. വളരെ ചെറുതായിരിക്കുമ്പോൾ മൃഗശാലയിലെത്തിയ പാമ്പുകൾ ഇപ്പോൾ തന്റെ ഏറ്റവും അടുത്ത സുഹൃത്തുക്കളാണെന്നാണ് ബ്രൂവർ പറയുന്നത്. എന്നാൽ വീഡിയോ കണ്ട് ഇത് ഭയാനകമായ കാഴ്‌ചയാണെന്നും അപകടകരമാണെന്നുമാണ് എല്ലാവരുടെയും അഭിപ്രായം.
