ജോഷിമഠിൻ്റെ വലിയൊരു ഭാഗം പൂർണമായും ഇടിഞ്ഞുതാഴുമെന്ന് ഐഎസ്ആർഒ മുന്നറിയിപ്പ് നൽകി. ഭൂമി ഇടിഞ്ഞുതാഴുന്നത് വേഗത്തിലാണ്. 2022 ഡിസംബർ 27 മുതൽ 2023 ജനുവരി 8 വരെ 12 ദിവസത്തിനുള്ളിൽ 5.4 സെന്റീമീറ്റർ ഇടിഞ്ഞുതാണിട്ടുണ്ട്. കഴിഞ്ഞ ഏപ്രിൽ മുതൽ നവംബർ വരെ ആകെ 8.9 സെന്റീമീറ്റർ മാത്രം ഇടിഞ്ഞു താഴ്ന്ന അവസ്ഥയിൽ നിന്നാണ് ഈ അടുത്ത ദിവസങ്ങളിൽ ഭൂമി താഴുന്നതിൻ്റെ വേഗത കൂടിയത്.
ഐഎസ്ആർഒയുടെ നാഷനൽ റിമോട്ട് സെൻസിങ് സെന്ററാണ് (എൻആർഎസ്‌സി) ജോഷിമഠിൻ്റെ ഉപഗ്രഹ ചിത്രങ്ങൾ വിലയിരുത്തി പ്രാഥമിക റിപ്പോർട്ട് സമർപ്പിച്ചിരിക്കുന്നത്. ഐഎസ്ആർഒയുടെ കാർട്ടോസാറ്റ് – 2എസ് ഉപഗ്രഹമാണ് ചിത്രങ്ങളെടുത്തത്.
സൈന്യത്തിൻ്റെ ഹെലിപ്പാഡും നരസിംഹ ക്ഷേത്രവും ഉൾപ്പെടെ ജോഷിമഠ് നഗരഭാഗം മുഴുവൻ താഴുന്നതായി ഉപഗ്രഹ ചിത്രങ്ങളിൽ കാണാം. ജോഷിമഠ് – ഓലി റോഡും ഇടിഞ്ഞു താഴുമെന്ന് വ്യക്തം. വീടുകളിലും റോഡുകളിലും രൂപപ്പെട്ട വിള്ളലുകൾ ശാസ്ത്രസംഘം വിശദമായി പരിശോധിച്ച് വിശദമായ റിപ്പോർട്ട് ഉടനടി സമർപ്പിക്കും.
