ലോകകപ്പിൽ ആദ്യ 5 ദിവസം പിന്നിടുമ്പോൾ മത്സരങ്ങളിൽ കണ്ടത് ഏഷ്യൻ അട്ടിമറിയാണ്. 5 ദിവസത്തിനിടെ 2 വമ്പൻ അട്ടിമറികളാണ് ഏഷ്യൻ ടീമുകൾ കളത്തിൽ നടത്തിയത്. അർജൻ്റീനയെ സൗദി അറേബ്യയും ജർമനിയെ ജപ്പാനും കീഴടക്കിയപ്പോൾ യുറഗ്വായെ ദക്ഷിണ കൊറിയ സമനിലയിൽ കുരുക്കി. 5 ആഫ്രിക്കൻ ടീമുകൾ മത്സരിച്ചതിൽ ഗോൾ നേടിയത് ഘാന മാത്രമാണ്. ഡെന്മാർക്ക്, ക്രൊയേഷ്യ എന്നീ യൂറോപ്യൻ വമ്പൻമാർക്ക് കാലിടറിയപ്പോൾ സ്പെയിനും ഇംഗ്ലണ്ടും ആദ്യ മത്സരത്തിൽ തിളങ്ങി.
ഖത്തർ ലോകകപ്പിൽ 32 ടീമുകളും ഓരോ മത്സരങ്ങൾ പൂർത്തിയാക്കിയപ്പോൾ 5 മത്സരങ്ങളിൽ ഇൻജുറി ടൈം കാൽ മണിക്കൂർ പിന്നിട്ടു. വാർ പരിശോധന കൂടി വന്നതോടെ ഇൻജുറി ടൈമിൽ വർധനയുണ്ടായി.
മികച്ച സ്കോറർമാർ
ആദ്യ മത്സരത്തിൽ 2 ഗോൾ നേടിയ കളിക്കാർ 6 പേരുണ്ട്. ബുകായോ സാക്ക(ഇംഗ്ലണ്ട്), എന്നർ വലൻസിയ(ഇക്വഡോർ), ഒളിവർ ജിറൂദ്(ഫ്രാൻസ്), ഫെറാൻ ടോറസ്(സ്പെയിൻ), മെഹ്ദി താരിമി (ഇറാൻ), റിച്ചാർലിസൺ(ബ്രസീൽ) എന്നിവരാണ് തുടക്കത്തിലെ ടോപ് സ്കോറർമാർ.
അസിസ്റ്റ്
കഴിഞ്ഞ തവണ 6 ഗോൾ നേടി ഗോൾഡൻ ബൂട്ട് സ്വന്തമാക്കിയ ഇംഗ്ലണ്ട് നായകൻ ഹാരി കെയ്നാണ് 2 അസിസ്റ്റുമായി മുന്നിലുള്ളത്. പോർച്ചുഗൽ താരം ബ്രൂണോ ഫെർണാണ്ടസും രണ്ടു ഗോളിന് വഴിയൊരുക്കി.
ഗോൾ അവസരങ്ങൾ
ഫ്രാൻസിൻ്റെ അന്റോയ്ൻ ഗ്രീസ്മാൻ ഓസ്ട്രേലിയയ്ക്കെതിരെ 6 ഗോളവസരങ്ങൾ ഒരുക്കിയതാണ് കണക്കിൽ മുന്നിൽ നിൽക്കുന്നത്. ഡെന്മാർക്ക് താരം ക്രിസ്റ്റ്യൻ എറിക്സൺ ടുനീസിയയ്ക്കെതിരെ 5 ഗോളവസരങ്ങൾ സൃഷ്ടിച്ചിരുന്നു.
ഗോൾ ഷോട്ടുകൾ
അർജൻ്റീനയുടെ സൂപ്പർ താരം ലയണൽ മെസ്സിയും ജർമനിയുടെ ഇൽകെ ഗുണ്ടോവാനുമാണ് ഗോൾ ഷോട്ടിൽ മുന്നിൽ നിൽക്കുന്നത്. ഇരുവരും ഗോൾ ലക്ഷ്യമാക്കി 3 ഷോട്ടുകൾ വീതം പായിച്ചിരുന്നു.
