യുഎഇ ദേശീയദിനം (ഈദ് അൽ ഇത്തിഹാദ്) ആഘോഷമാക്കാനൊരുങ്ങി ഗ്ലോബൽ വില്ലേജ്. ആരെയും ആകർഷിക്കുന്ന കരിമരുന്ന് പ്രകടനം, ഡ്രോൺ പ്രദർശനം, സംഗീത പരിപാടികൾ, സാംസ്കാരിക പരിപാടികൾ തുടങ്ങിയവയാണ് ഗ്ലോബൽ വില്ലേജിൽ ഒരുങ്ങുന്നത്.
ഇന്ന് മുതൽ ഡിസംബർ 4 വരെയാണ് യുഎഇയുടെ 53-ാമത് ദേശീയ ദിനത്തിൻ്റെ അവിസ്മരണീയമായ ആഘോഷത്തിന് ഗ്ലോബൽ വില്ലേജിൽ നടക്കുക. ഗ്ലോബൽ വില്ലേജിലെ സ്ഥിരം അലങ്കാരങ്ങൾക്ക് പുറമെ ദേശീയ ദിനത്തിൽ പ്രത്യേക ലൈറ്റിംഗ് ഡിസ്‌പ്ലേകളും ജനങ്ങൾക്ക് കൗതുകകരമായ കാഴ്ചയാകും.
നവംബർ 29 മുതൽ ഡിസംബർ 3 വരെ രാത്രി 9 മണിക്ക് യുഎഇ പതാകയുടെ നിറങ്ങൾ പ്രതിഫലിപ്പിക്കുന്ന കരിമരുന്ന് പ്രകടനം നടക്കും. അതോടൊപ്പം, ഡിസംബർ 2-ന് സന്ദർശകർക്കായി പ്രത്യേക ഡ്രോൺ പ്രദർശനവും ഒരുക്കും. ഡിസംബർ 1 മുതൽ 3 വരെ പാർക്കിൻ്റെ പ്രധാന വേദിയിൽ അവതരിപ്പിക്കുന്ന ‘ഹവാ ഇമാറാതി’ എന്ന ഗംഭീരമായ തിയേറ്ററാണ് ആഘോഷങ്ങളുടെ ഹൈലൈറ്റ്.
