ചരിത്രത്തിലെ ഏറ്റവും വലിയ ബജറ്റിന് അംഗീകാരം നൽകി ദുബായ്. 2025 മുതൽ 2027 വരെ കാലയളവിലേയ്ക്കുള്ള ബജറ്റാണ് പ്രഖ്യാപിച്ചത്. ദുബായ് ഭരണാധികാരി ഷെയ്ഖ് മുഹമ്മദ് ബിൻ റാഷിദ് അൽ മക്തൂമാണ് ഇത് സംബന്ധിച്ച പ്രഖ്യാപനം നടത്തിയത്.
302 ബില്യൺ ദിർഹം വരുമാനവും 272 ബില്യൺ ദിർഹം ചെലവുമാണ് പ്രതീക്ഷിക്കുന്നത്. പുതിയ ബജറ്റിൻ്റെ 46 ശതമാനവും പുതിയ വിമാനത്താവളത്തിൻ്റെ നിർമ്മാണത്തിന് പുറമെ റോഡുകൾ, പാലങ്ങൾ, ഊർജ്ജം, ഡ്രെയിനേജ് ശൃംഖലകൾ എന്നിവയുൾപ്പെടെയുള്ള അടിസ്ഥാന സൗകര്യങ്ങൾ പദ്ധതികൾക്കായി നീക്കിവച്ചിട്ടുണ്ടെന്നും ബജറ്റിൻ്റെ 30 ശതമാനം ആരോഗ്യം, വിദ്യാഭ്യാസം, സാമൂഹിക വികസനം, പാർപ്പിടം, മറ്റ് സാമൂഹിക സേവനങ്ങൾ എന്നിവയ്ക്കായും മാറ്റിവെയ്ക്കുമെന്നും ഷെയ്ഖ് മുഹമ്മദ് വ്യക്തമാക്കി.
ദുബായ് സർക്കാരിന് സാമ്പത്തിക സുസ്ഥിരത സൃഷ്ടിക്കുകയാണ് പുതിയ ബജറ്റിലൂടെ ലക്ഷ്യമിടുന്നതെന്ന് ഷെയ്ഖ് മുഹമ്മദ് കൂട്ടിച്ചേർത്തു. ഈ മാസം ആദ്യം യുഎഇ കാബിനറ്റ് 2025-ലെ ഫെഡറൽ ബജറ്റ് 71.5 ബില്യൺ ദിർഹത്തിന് അംഗീകാരം നൽകിയിരുന്നു. ഇത് രാജ്യത്തിൻ്റെ ചരിത്രത്തിലെ ഏറ്റവും വലിയ ബജറ്റ് കൂടിയായിരുന്നു.
