ഒമാനില്‍ ഇന്നും നാളെയും മഴക്ക് സാധ്യത. അറബിക്കടലിൽ രൂപംകൊണ്ട ഉഷ്ണമേഖലാ ന്യൂനമർദത്തിന്റെ ഫലമായാണ് രാജ്യത്ത് മഴ പെയ്യുകയെന്ന് ഒമാൻ കാലാവസ്ഥാ നിരീക്ഷണ കേന്ദ്രം അറിയിച്ചു. ഇന്ന് വൈകുന്നേരവും നാളെ രാവിലെയുമായി മഴയ്ക്ക് സാധ്യതയുള്ളതായാണ് വിലയിരുത്തൽ.
അറബിക്കടലിൽ രൂപംകൊണ്ട ന്യൂനമർദം ഉഷ്ണമേഖലാ ന്യൂനമർദമായി മാറിയതായും ഒമാൻ തീരപ്രദേശത്ത് നിന്ന് ഏകദേശം 950 കിലോമീറ്റർ അകലെയാണ് ഇത് സ്ഥിതി ചെയ്യുന്നതെന്നും അധികൃതർ വ്യക്തമാക്കി. ഉഷ്ണമേഖല ന്യൂനമർദം പടിഞ്ഞാറോട്ട് ദോഫാർ ഗവർണറേറ്റിലേക്കും ഏദൻ ഉൾക്കടലിലേക്കും നീങ്ങുകയാണ്. ഇത് തീവ്ര ന്യൂനമർദമായി വികസിക്കുമെന്നും ഇന്ന് രാത്രി മുതൽ വ്യത്യസ്ത തീവ്രതയിലുള്ള മഴ ലഭിക്കുമെന്നും മുന്നറിയിപ്പിലുണ്ട്.
ദോഫാർ, മസ്‌കത്ത്, തെക്കൻബാത്തിന, ദാഖിലിയ, വടക്കൻ ശർഖിയ ഗവർണറേറ്റുകളിൽ 30 മുതൽ 60 മില്ലിമീറ്റർ വരെ മഴ പെയ്തേക്കും. ഇത് വാദികൾ നിറഞ്ഞൊഴുകാനും വെള്ളപ്പൊക്കത്തിനും കാരണമാകും. അതിനാൽ ജനങ്ങൾ താഴ്ന്നതോ വെള്ളക്കെട്ടുള്ളതോ ആയ സ്ഥലങ്ങളിലേക്ക് പോകരുതെന്നും വാഹനയാത്രക്കാർ ജാഗ്രത പാലിക്കണമെന്നും അധികൃതർ നിർദേശിച്ചു.
