ഉത്തർ പ്രദേശിൽ വധുവിൻ്റെ വീട്ടുകാര്‍ സമ്മാനമായി നല്‍കിയ കാര്‍ വരൻ ടെസ്റ്റ് ഡ്രൈവ് നടത്തുന്നതിനിടെ, വരൻ്റെ അമ്മായിക്ക് ദാരുണാന്ത്യം. വധുവിൻ്റെ വീട്ടുകാര്‍ നൽകിയ വിവാഹസമ്മാനമായിരുന്നു കാര്‍.
ഇറ്റാവ ജില്ലയിലെ അക്ബര്‍ ഗ്രാമത്തില്‍ കഴിഞ്ഞ ദിവസം രാത്രിയാണ് സംഭവം നടക്കുന്നത്. വിവാഹ ചടങ്ങിനിടെ, ഡ്രൈവിംഗ് അറിയാത്ത 24കാരനായ വരന്‍ അരുൺ കാര്‍ ഓടിച്ചുനോക്കി. വരൻ്റെ ബന്ധുവായ സ്ത്രീയുടെ മേൽ കാര്‍ കയറിയിറങ്ങി ഗുരുതരമായി പരുക്കേറ്റായിരുന്നു മരണം.
ഉത്തര്‍പ്രദേശ് സായുധ സേനാ ജവാനാണ് അരുണ്‍. വിവാഹനിശ്ചയത്തിലെ തിലക് ചടങ്ങിനിടെയാണ് കാര്‍ സമ്മാനമായി നല്‍കിയത്.
ഡ്രൈവിങ് അത്ര വശമില്ലാത്ത അരുൺ കാർ ആക്‌സിലേറ്ററില്‍ ചവിട്ടിയപാടെ നിയന്ത്രണം വിട്ട് കാര്‍ മുന്നോട്ടുകുതിച്ചു. കാറിന് മുന്നിലായി അരുണിൻ്റെ അമ്മായി സരളാദേവി നിന്നിരുന്നു. പത്തു വയസ്സുള്ള പെൺകുട്ടി അടക്കം 4 പേർക്ക് കൂടി അപകടത്തിൽ പരുക്കേറ്റിട്ടുണ്ട്. അശ്രദ്ധമായി വണ്ടി ഓടിച്ചത് അടക്കമുള്ള വകുപ്പുകള്‍ ചേര്‍ത്ത് അരുണിനെതിരെ കേസെടുക്കുമെന്ന് പൊലീസ് പറഞ്ഞു.
