ബോളിവുഡ് താരം ഗോവിന്ദയ്ക്ക് വെടിയേറ്റു. സ്വന്തം റിവോൾവറിൽ നിന്ന് അബദ്ധത്തിലാണ് താരത്തിന് വെടിയേറ്റത്. വീട്ടിൽ വെച്ച് സ്വന്തം റിവോൾവർ പരിശോധിക്കുന്നതിനിടെ കാലിൽ വെടിയേൽക്കുകയായിരുന്നു. ഇന്ന് പുലർച്ചെ കൊൽക്കത്തയ്ക്ക് തിരിക്കാൻ തയ്യാറെടുക്കുന്നതിനിടെയാണ് സംഭവം.
നടന്റെ കാലിൽ നിന്നും ഡോക്ടർ വെടിയുണ്ട നീക്കം ചെയ്‌തതായും ആരോഗ്യനില തൃപ്തികരമാണെന്നും അദ്ദേഹത്തിൻ്റെ മാനേജർ അറിയിച്ചു. പുലർച്ചെ 6 മണിക്ക് കൊൽക്കത്തയിലേക്ക് പുറപ്പെടുന്ന വിമാനത്തിൽ ഗോവിന്ദയും മാനേജരും പോകാനിരിക്കെയായിരുന്നു സംഭവം.
ലൈസൻസ് ഉള്ള റിവോൾവർ അദ്ദേഹം ഒരു കെയ്സിലാണ് സൂക്ഷിച്ചിരുന്നത്. അത് കൈയിൽ നിന്നും താഴെ വീണപ്പോൾ അബദ്ധത്തിൽ വെടി പൊട്ടുകയായിരുന്നു എന്നാണ് മാനേജർ വ്യക്തമാക്കുന്നത്. നടന്റെ പരിക്ക് ഗുരുതരമല്ലെന്ന് മുംബൈ പൊലീസും സ്ഥിരീകരിച്ചു.
