സൗത്ത് ഇന്ത്യയിലെ ഏറ്റവും വലിയ സിനിമാ അവാർഡായ SIIMAയുടെ (സൗത്ത് ഇന്ത്യൻ ഇൻ്റർനാഷണൽ മൂവി അവാർഡ്) 12-ാമത് പതിപ്പ് ദുബായിൽ സംഘടിപ്പിക്കും. സെപ്റ്റംബർ 14, 15 തിയതികളിൽ ദുബായ് വേൾഡ് ട്രേഡ് സെൻ്ററിൽ വെച്ചാണ് SIIMA നടക്കുക. തെന്നിന്ത്യയിലെ സൂപ്പർ താരങ്ങളായ റാണ ദഗുബാട്ടിയും പൂജ ഹെഗ്ഡെയുമാണ് അവാർഡിന്റെ തിയതി പ്രഖ്യാപിച്ചത്.
തെന്നിന്ത്യൻ സിനിമയുടെ ആഘോഷമായി മാറിയ SIIMAയിൽ നാല് ദക്ഷിണേന്ത്യൻ ഭാഷകളിലായി 20 അവാർഡുകളാണ് വിതരണം ചെയ്യുന്നത്. സെപ്തംബർ 14-ന് തെലുങ്ക്, കന്നഡ സിനിമ മേഖലയിലെയും 15-ന് തമിഴ്, മലയാളം സിനിമാ മേഖലയിലെയും പ്രതിഭകളെ ആദരിക്കും.
അതോടൊപ്പം, സിനിമാ ജീവിതത്തിന്റെ 50 വർഷങ്ങൾ പിന്നിടുന്ന നന്ദമുരി ബാലകൃഷ്ണയെയും ശിവ് രാജ്കുമാറിനെയും 14-ന് SIIMA വേദിയിൽ വെച്ച് ആദരിക്കും. 15-ന് തെന്നിന്ത്യൻ സിനിമയിൽ മികച്ച സംഭാവനകൾ നൽകിയ നടൻ അന്തരിച്ച പത്മഭൂഷൺ വിജയകാന്തിനെയും അനുസ്മരിക്കും. ഇതിനുപുറമെ തെന്നിന്ത്യൻ താരങ്ങളുടെ നിരവധി കലാ പ്രകടനങ്ങളും SIIMA വേദിക്ക് പകിട്ടേകും.
