ഈ വർഷത്തെ വനിതാ ട്വൻ്റി20 ലോകകപ്പ് ക്രിക്കറ്റ് ടൂർണമെന്റിന് യുഎഇ വേദിയാകും. ബംഗ്ലാദേശിൽ നടത്താനിരുന്ന ടൂർണമെന്റ് ആഭ്യന്തര സംഘർഷങ്ങൾ തുടരുന്ന സാഹചര്യത്തിലാണ് യുഎഇയിലേയ്ക്ക് മാറ്റാൻ ഐസിസി തീരുമാനിച്ചത്.
ദുബായിലും ഷാർജയിലുമായി ഒക്ടോബർ 3 മുതൽ 20 വരെയാണ് മത്സരങ്ങൾ നടക്കുക. അതേസമയം, ബംഗ്ലാദേശ് ക്രിക്കറ്റ് ബോർഡ് തന്നെയാണ് മത്സരത്തിന്റെ സംഘാടകർ.
ബംഗ്ലാദേശിലെ സംഘർഷങ്ങളേത്തുടർന്ന് ലോകകപ്പിൽ പങ്കെടുക്കുന്ന ടീമുകൾ ആശങ്ക അറിയിച്ചതോടെയാണ് ടൂർണമെന്റ് ഐസിസി ആസ്ഥാനം നിലനിൽക്കുന്ന യുഎഇയിലേക്ക് മാറ്റാൻ തീരുമാനിച്ചത്. യുഎഇയിൽ വെച്ച് 2021ലും ട്വൻ്റി20 ലോകകപ്പ് സംഘടിപ്പിച്ചിരുന്നു.
