ഈ വര്‍ഷത്തെ നബിദിനം ഒക്ടോബര്‍ എട്ടിന്. ആഘോഷങ്ങൾക്ക് ദിവസങ്ങൾ മാത്രം ബാക്കി നില്‍ക്കെ യുഎഇയില്‍ നീണ്ട വാരാന്ത്യ അവധിക്ക് സാധ്യതയില്ല. പ്രവാചകന്റെ ജന്മദിനം ശനിയാഴ്ച ആയതിനാല്‍ നീണ്ട അവധി ദിനങ്ങൾ ഉണ്ടാകില്ല. ശനി, ഞായർ അവധി ലഭിക്കുന്നവർക്ക് ഇത് ബാധകമല്ലെങ്കിലും ശനിയാഴ്ചകളിൽ ജോലി ചെയ്യുന്നവർക്ക് അവധിയായി ലഭിക്കും.
എന്നാല്‍ ഡിസംബർ 1, 2 തീയതികളിൽ രാജ്യത്തിന്റെ ദേശീയ ദിനാഘോഷങ്ങളുടെ ഭാഗമായി നീണ്ട വാരാന്ത്യം ഉണ്ടാകുമെന്ന് പ്രതീക്ഷിക്കുന്നു. ഈ വർഷം വ്യാഴം, വെള്ളി ദിവസങ്ങളിലാണ് ദേശീയ ദിനാചരണം. ഡിസംബർ 1 വ്യാഴാ‍ഴ്ച മുതല്‍ ഡിസംബർ 4 ഞായർ വരെ നാല് ദിവസം ഔദ്യോഗിക അവധി ഉണ്ടാകുമെന്നാണ് പ്രതീക്ഷ.
വര്‍ഷാന്ത്യത്തിലേക്ക് അടുക്കുമ്പോൾ പൊതു അവധികളും അവസാനിക്കുകയാണ് . നബി ദിനവും ദേശീയ ദിനവും മാത്രമാണ് യുഎഇയില്‍ അവശേഷിക്കുന്നത്. പിന്നീട് 2023 ഏപ്രിലിൽ ഈദ് അൽ ഫിത്തറിനോട് അനുബന്ധിച്ചാകും താമസക്കാർക്ക് നാല് ദിവസത്തെ നീണ്ട വാരാന്ത്യം ലഭ്യമാവുക.
അതേസമയം നബിദിന ആഘോഷങ്ങളെപ്പറ്റിയും അവധിയെപ്പറ്റിയും വിശദമായ ഔദ്യോഗിക അറിയിപ്പുകൾ വരും ദിവസങ്ങളില്‍ പുറത്തുവരും.
