തുടർച്ചയായ ഹിറ്റുകൾക്ക് ശേഷം തിയേറ്റർ അടക്കിവാഴാൻ വീണ്ടും താരരാജാവെത്തുന്നു. മമ്മൂട്ടിയെ നായകനാക്കി വൈശാഖ് സംവിധാനം ചെയ്യുന്ന മാസ്സ് ആക്ഷൻ കോമഡി ചിത്രം ടർബോയുടെ റിലീസ് തിയതി പ്രഖ്യാപിച്ചിരിക്കുകയാണ് അണിയറപ്രവർത്തകർ. ജൂൺ 13നാണ് ചിത്രം തിയേറ്ററുകളിലെത്തുക.
മമ്മൂട്ടി കമ്പനിയുടെ ബാനറിൽ നിർമ്മിക്കുന്ന ടർബോ വമ്പൻ ബജറ്റിലാണ് ഒരുങ്ങുന്നത്. മമ്മൂട്ടി കമ്പനിയുടെ ബാനറിൽ നിർമ്മിക്കുന്ന അഞ്ചാമത്തെ സിനിമയാണിത്. ചിത്രത്തിൽ ടർബോ ജോസ് എന്ന കഥാപാത്രത്തെയാണ് മമ്മൂട്ടി അവതരിപ്പിക്കുന്നത്. സിനിമയുടെ ഫസ്റ്റ് ലുക്ക് കണ്ടപ്പോൾ മുതൽ മമ്മൂട്ടിയുടെ ഗെറ്റപ്പ് ആരാധകർ ഏറ്റെടുത്തിരുന്നു. വേഫറർ ഫിലിംസും ഓവർസീസ് ഡിസ്ട്രിബ്യൂഷൻ ട്രൂത്ത് ഗ്ലോബൽ ഫിലിംസും ചേർന്നാണ് ചിത്രത്തിന്റെ ഡിസ്ട്രിബ്യൂഷൻ.
ആക്ഷൻ രംഗങ്ങൾക്ക് ഏറെ പ്രാധാന്യം നൽകിയാണ് ചിത്രം ഒരുങ്ങുന്നത്. കന്നഡ താരം രാജ് ബി ഷെട്ടിയും തെലുങ്ക് നടൻ സുനിലുമാണ് മറ്റ് സുപ്രധാന വേഷങ്ങളിലെത്തുന്നത്. വിയറ്റ്നാം ഫൈറ്റേർസാണ് ചിത്രത്തിലെ ആക്ഷൻ രംഗങ്ങൾ കൈകാര്യം ചെയ്യുന്നത്. ചിത്രത്തിന് പശ്ചാത്തല സംഗീതം ഒരുക്കിയിരിക്കുന്നത് ക്രിസ്റ്റോ സേവ്യറും ടീമും ചേർന്നാണ്. തുടർച്ചയായി ഹിറ്റുകൾ സൃഷ്ടിച്ച് തിയേറ്റർ അടക്കിവാണുകൊണ്ടിരിക്കുകയാണ് മമ്മൂട്ടി. തന്റെ താരപദവി കാര്യമാക്കാതെ അഭിനയത്തെ മാത്രം കണക്കിലെടുത്ത് മമ്മൂട്ടി ചെയ്ത കഥാപാത്രങ്ങൾ പ്രേക്ഷകർ ഇരുകയ്യുംനീട്ടിയാണ് സ്വീകരിച്ചത്.
