മലയാള സിനിമാ ആരാധകരുടെ ഇഷ്ട താരദമ്പതികളാണ് ബിജു മേനോനും സംയുക്താ വർമയും. ഒരു കാലത്ത് ശക്തമായ സ്ത്രീ കഥാപാത്രങ്ങളിലൂടെ മലയാള സിനിമയുടെ മുഖമായി മാറിയ സംയുക്തയും ഇപ്പോഴും സിനിമയിൽ സജീവമായി നിലകൊള്ളുന്ന ബിജു മേനോനും സിനിമാ പ്രേമികൾക്ക് വളരെ പ്രിയപ്പെട്ടവരാണ്. ഇരുവരും ചേർന്ന് ഗുരുവായൂർ ക്ഷേത്രത്തിൽ ദർശനം നടത്തിയതിന്റെ ദൃശ്യങ്ങളാണ് ഇപ്പോൾ സാമൂഹ്യമാധ്യമങ്ങളിൽ വൈറലാകുന്നത്.
കേരള സാരിയിൽ മലയാളി തനിമയോടെയാണ് സംയുക്ത ക്ഷേത്രത്തിലെത്തിയത്. വെള്ള മുണ്ടും നേരിയതുമായിരുന്നു ബിജു മേനോന്റെ വേഷം. വളരെ വിരളമായി മാത്രം പൊതുസ്ഥലത്ത് പ്രത്യക്ഷപ്പെടുന്ന ദമ്പതികളെ ആരാധകരും മാധ്യമങ്ങളും കൂട്ടമായി പൊതിയുകയായിരുന്നു. ഇരുവർക്കുമൊപ്പം ഫോട്ടോയെടുക്കാനും നിരവധി പേരാണ് എത്തിയത്.
വ്യത്യസ്തമായ വേഷങ്ങളിലൂടെ മലയാളി പ്രേക്ഷകരുടെ ഇഷ്ടതാരമായി മാറിയ സംയുക്താ വർമ്മ ഇപ്പോൾ അഭിനയിക്കുന്നില്ലെങ്കിലും താരം സിനിമയിലേക്ക് തിരിച്ചുവരുന്നത് കാണാൻ കാത്തിരിക്കുന്നവരാണ് മലയാളികളെല്ലാം. 2002 നവംബർ 21-നായിരുന്നു സംയുക്ത വർമ്മയും ബിജു മേനോനും തമ്മിലുള്ള വിവാഹം നടക്കുന്നത്. വിവാഹ ശേഷം സിനിമയിൽ നിന്ന് വിട്ടുനിന്ന സംയുക്ത പൂർണ്ണമായും ഒരു കുടുംബിനിയായി മാറുകയായിരുന്നു.
