ഭക്തി സാന്ദ്രമാകുന്ന ഒരു റമദാൻ കാലം. വിശ്വാസികൾ പ്രാർത്ഥനയ്ക്ക് എത്തുന്ന മസ്ജിദുകൾ മുതൽ ആളുകൾ സംഘടിക്കുന്ന ഇടങ്ങളിലും സോഷ്യൽ മീഡിയ ഉളളടക്കങ്ങളിലും പ്രകടമാണത്. പകലെന്നോ രാത്രിയെന്നോ വെത്യാസമില്ലാതെ അറബ് ലോകത്ത് നാടും നഗരവും റമദാൻ കാലത്തെ അടയാളപ്പെടുത്തുന്നതാണ്.
മസ്ജിദുകളിലെ തയ്യാറെടുപ്പുകളാണ് പ്രധാനം. കൂടുതൽ വിശ്വാസികളെ ഉൾക്കൊളളാനുളള ഒരുക്കങ്ങൾ മസ്ജിദുകളിലുണ്ടാവും. റമദാൻ കാലത്തെ വെള്ളിയാള്ചകളിൽ മിക്ക പ്രാർത്ഥനാ കേന്ദ്രങ്ങളിലും മുറ്റവും കടന്ന് വിശ്വാസികളുടെ നിരയുണ്ടാകും. പള്ളികളോട് അനുബന്ധിച്ച് ഇഫ്താർ ടെൻ്റുകൾ ഒരുക്കുന്നതും പതിവാണ്.
ആദ്യമായി നോമ്പുതുക്കാനെത്തുന്ന പുതുതലമുറയിലെ വിശ്വാസികളും പ്രത്യേകതയാണ്. ഓരോ വിശ്വാസി കുടുംബത്തിനും ആഹ്ളാദം പകരുന്ന അനുഭവമാണത്. ആത്മീയതയുടെ പാതയിലൂടെ സഞ്ചരിക്കുന്ന പുതുതലമുറ കുടുംബത്തിനും നാടിനും ഭാവിയുടെ നല്ല പ്രതീക്ഷകൾ ജ്വലിപ്പിക്കുന്നതാണ്.
പകൽ മുഴുവൻ നീണ്ട വ്രതത്തിന് ശേഷമെത്തുന്ന നോമ്പുതുറയാണ് അതിപ്രധാനം. ഇതിനായി പ്രത്യേക തയ്യാറെടുപ്പുകളാണ് നടത്തുക. നോമ്പുതുറക്കായി സംഘടിപ്പിക്കുന്ന ഇഫ്താർ കൂട്ടായ്മകൾ സ്നേഹത്തിൻ്റേയും സാഹാദോര്യത്തിൻ്റേയും മൂല്യങ്ങൾ ഉയർത്തിപ്പിടിക്കും. ജാതിമത ഭേതമെന്യേ ജനങ്ങൾ ഇഫ്താർ കൂട്ടായ്മകളിൽ പങ്കെടുക്കും. റസ്റ്റോറൻ്റുകളിൽ നോമ്പുതുറക്കായി വിവിധ വിഭവങ്ങളൊരുങ്ങും. വീടുകളിലെ അടുക്കളകളിൽ നോമ്പുതുറ രുചികളുടെ പരീക്ഷണങ്ങളും പതിവാണ്.
റമദാൻ കാലത്ത് നോമ്പുതുറ വിഭവങ്ങൾ ഒരുക്കാൻ മാർക്കറ്റുകൾ സജ്ജമാകും. റമദാൻ വിപണി എല്ലാ ഇടങ്ങളിലുമുണ്ട്. മാളുകളിൽ പ്രത്യേക അലങ്കാരങ്ങളൊരുക്കിയാണ് റമദാൻ കാലത്തെ വരവേൽക്കുക. കെട്ടിടങ്ങളും ദീപാലകൃതമാകും. ആളുകൾ സംഗമിക്കുന്ന കേന്ദ്രങ്ങളിലെല്ലാം റമദാൻ സന്ദേശങ്ങൾ ഉയരുകയും റമദാൻ്റെ സന്തോഷം പ്രകടമാവുകയും ചെയ്യും.
അപരനെ നമ്മെപ്പോലെത്തന്നെ കാണുകയും പരിഗണിക്കുകയും ചെയ്യുന്ന കാലമാണിത്. ലോകമാകെ ഒറ്റപ്പെട്ട മനുഷ്യർക്ക് സഹായമെത്തിക്കുന്ന കാലം. ദുരിതമനുഭവിക്കുന്ന മനുഷ്യരിലേക്ക് കാര്യണ്യത്തിൻ്റെ സഹായ ഹസ്തങ്ങളും നീളാറുണ്ട്. അറബ് രാജ്യങ്ങൾ വൻതോതിൽ നിർദ്ധന രാജ്യങ്ങളിലേക്കും ദുരിത ബാധിക മേഖലകളിലേക്കും സഹായങ്ങൾ വിതരണം ചെയ്യും. ഒരുമനസ്സോടെ വിശ്വാസലോകം ലോകത്തെ ഒന്നായികാണുന്ന കാലം കൂടിയാണ് റമദാൻ ദിനങ്ങൾ.
