കുമ്പളങ്ങി നൈറ്റ്സിലെ ഷമ്മിയെ മറക്കാനാവുമോ മലയാളികൾക്ക്. ഷമ്മിയെ പോലൊരു ഡ്യൂപ്പായിരുന്നു കഴിഞ്ഞ ദിവസം സോഷ്യൽ മീഡിയയിൽ വൈറലായത്.
ഫഹദിന്റെ അതേ രൂപഭാവത്തില്‍ ഒരു പത്ര വിതരണക്കാരൻ. “രാവിലെ ചായകുടിക്കാൻ ഇറങ്ങിയപ്പോ പത്രം ഇട്ടിട്ട് ഒരാൾ പോകുന്നു നോക്കിയപ്പോ ഫഹദ് ഫാസിൽ” ലോക്കേഷന്‍ വയനാട് എന്ന ക്യാപ്ഷനോടെയാണ് വീഡിയോ പ്രചരിച്ചത്. പത്രം ഇടുന്നയാളോട് തന്നെ ഫഹദ് ഫാസിലിനെപ്പോലുണ്ടെന്ന് വീഡിയോ എടുക്കുന്നവര്‍ പറയുന്നതും കേൾക്കാം. ഇതിൽ കൂടുതൽ വിവരങ്ങളൊന്നും കഴിഞ്ഞ ദിവസം ലഭ്യമായിരുന്നില്ല,
ഷമ്മിയുടെ ഡ്യൂപ്പിന്റെ പേര് ബിജേഷ് എന്നാണ്. വയനാട് മാനന്തവാടി കാട്ടിമൂല ആണ് സ്വദേശം. പത്രത്തിന്റെ ഏജൻസി ആണെന്നും അത് കഴിഞ്ഞു ഓട്ടോറിക്ഷ ഓടിക്കും, കൃഷിയും ഉണ്ടെന്നും ബിജേഷ് പറയുന്നു. ഭാര്യയും ഒരു മകളും മകനും അടങ്ങുന്നതാണ് ബിജേഷിന്റെ കുടുംബം.
കഴിഞ്ഞ ദിവസം പത്രമിടാൻ പോയപ്പോഴാണ് ഒരു കടയിൽനിന്ന് ഒരാൾ ഫഹദ് ഫാസിലിനെ പോലെ ഉണ്ടല്ലോ എന്ന് വിളിച്ചു ചോദിക്കുകയും ഫോട്ടോ എടുക്കുകയും ചെയ്തത്. അപ്പോഴും അവർ വിഡിയോ എടുക്കുമെന്നോ അത് വൈറലാകുമെന്നോ കരുതിയില്ലെന്നും ബിജേഷ് പറയുന്നു.
ഫഹദ് ഫാസിലിന്റെ കുമ്പളങ്ങി നൈറ്റ്സ് എന്ന സിനിമയിലെ ഷമ്മി എന്ന കഥാപാത്രത്തെപ്പോലെ ഉണ്ട് എന്നാണ് പലരും പറയുന്നത്. അങ്ങനെ ആലോചിച്ചു വിഡിയോ കണ്ടപ്പോൾ എനിക്കും അങ്ങനെ തോന്നിയെന്നും ബിജേഷ് പറയുന്നു. എന്നാൽ നേരിട്ട് കാണുമ്പോൾ ഫഹദ് ഫാസിലിന്റെ ഛായ ഇല്ലെന്ന് ബിജേഷ് തന്നെ പറയുന്നു.
എന്തായാലും ശരി വീഡിയോ വൈറലായതോടെ ബിജേഷിനെ ഒരുപാട് പേർ വിളിച്ചു. ഭാവന സ്റ്റുഡിയോയിൽ നിന്ന് തന്നെ ഒരു വിളി വന്നുവെന്നും എന്റെ ഒരു ഫോട്ടോ അയച്ചു കൊടുക്കാൻ പറഞ്ഞുവെന്നും ബിജേഷ് പറയുന്നു. ബിജേഷ് ഫോട്ടോ അയച്ച് കൊടുത്തിട്ടുണ്ട്. അവർ ഇനി സിനിമയിലേക്ക് വിളിച്ചാൽ പോകുമെന്നും ഈ വയനാടുകാരൻ പറയുന്നു!!!
