പൊലീസ് കോൺസ്റ്റബിൾ റിക്രൂട്ട്‌മെൻറ് പരീക്ഷയെഴുതാൻ സണ്ണി ലിയോണോ? സണ്ണിയുടെ ഹാൾ ടിക്കറ്റ് കണ്ട് അമ്പരന്നിരിക്കുകയാണ് സോഷ്യൽ മീഡിയ. ഉത്തർപ്രദേശിലെ പൊലീസ് കോൺസ്റ്റബിൾ റിക്രൂട്ട്‌മെൻറ് പരീക്ഷയുടെ അഡ്മിറ്റ് കാർഡിലാണ് സണ്ണി ലിയോണിൻറെ പേരും ചിത്രവും ഇടം പിടിച്ചിരിക്കുന്നത്.
ഉത്തർപ്രദേശ് പൊലീസ് റിക്രൂട്ട്‌മെൻറ് ആൻഡ് പ്രൊമോഷൻ ബോർഡിൻറെ (യുപിപിആർബി) വെബ്‌സൈറ്റിൽ കോൺസ്റ്റബിൾ (സിവിൽ പൊലീസ്) തസ്തികയിലേക്കാണ് രജിസ്ട്രേഷൻ നടത്തിയതെന്നാണ് മാധ്യമ റിപ്പോർട്ടുകൾ പറയുന്നത്.ഫെബ്രുവരി 17ന് നടന്ന പരീക്ഷയുടെ അഡ്മിറ്റ് കാർഡാണ് ഇപ്പോൾ പുറത്ത് വന്നിട്ടുള്ളത്. രജിസ്ട്രേഷൻ സമയത്ത് ഉപയോഗിച്ച മൊബൈൽ നമ്പർ യുപിയിലെ മഹോബയിൽ താമസിക്കുന്നയാളുടേതാണ്. രജിസ്ട്രേഷൻ ഫോമിൽ നൽകിയിരിക്കുന്ന വിലാസം മുംബൈയിലാണ്.
അഡ്മിറ്റ് കാർഡിൽ അനുവദിച്ചിട്ടുള്ള പരീക്ഷാ കേന്ദ്രം കനൗജിലെ തിരവയിലുള്ള ശ്രീമതി സോനശ്രീ മെമ്മോറിയൽ ഗേൾസ് കോളേജായിരുന്നു. എന്നാൽ, പരീക്ഷാ ദിവസം ഒരു ഉദ്യോഗാർത്ഥിയും പ്രത്യേക അഡ്മിറ്റ് കാർഡുമായി ഹാജരായില്ലെന്ന് കോളേജ് അഡ്മിനിസ്ട്രേഷൻ അറിയിച്ചു. അതേസമയം, അഡ്മിറ്റ് കാർഡ് വ്യാജമാണെന്നും ഉദ്യോഗാർത്ഥി രജിസ്ട്രേഷൻ പ്രക്രിയയിൽ നടിയുടെ ഫോട്ടോ അപ്‌ലോഡ് ചെയ്തതാണെന്നുമാണ് പൊലീസ് പറയുന്നത്.
