ബോളിവുഡിനെ വിറപ്പിച്ച വില്ലൻ ഇനി മലയാളത്തിലേക്ക്. തന്റെ ആദ്യ മലയാള ചിത്രത്തിലെ വില്ലൻ വേഷം ചോദിച്ചു വാങ്ങിയതാണ് ഈ താരം. ആഷിഖ് അബു സംവിധാനം ചെയ്യുന്ന റൈഫിള്‍ ക്ലബ്ബ് എന്ന ചിത്രത്തില്‍ വില്ലനായി എത്തുകയാണ് ബോളിവുഡ് സംവിധായകനും നടനുമായ സാക്ഷാൽ അനുരാഗ് കശ്യപ്. നേരത്തെ നയന്‍താര നായികയായെത്തിയ തമിഴ് ചിത്രം ‘ഇമൈക്ക നൊടികളില്‍’ അനുരാഗ് കശ്യപ് വില്ലനായി എത്തിയിരുന്നു.
നേരത്തെ അണിയറ പ്രവർത്തകർ പുറത്ത് വിട്ട ചിത്രത്തിന്റെ കാസ്റ്റിംഗ് കോള്‍ പോസ്റ്ററിന് താഴെ ‘അതിഥി വേഷത്തിന് നിങ്ങള്‍ക്ക് മുംബൈയില്‍ നിന്ന് ഒരു ഉത്തരേന്ത്യന്‍ നടനെ ആവശ്യമുണ്ടോ’ എന്ന് അനുരാഗ് കശ്യപ് കമന്റ് ചെയ്തിരുന്നു. ഇത് വൈറൽ ആയി. ‘അതെ സര്‍ജി, സ്വാഗതം’ എന്നായിരുന്നു താരത്തിന്റെ ചോദ്യത്തിന് ആഷിഖ് അബു നല്‍കിയ മറുപടി.
ഇതിന് പിന്നാലെയാണ് ചിത്രത്തിലെ വില്ലന്‍ റോളിലേക്ക് അനുരാഗ് കശ്യപിനെ കാസ്റ്റ് ചെയ്തത്. ദിലീഷ് കരുണാകരനൊപ്പം ഷറഫും സുഹാസുമാണ് ‘റൈഫിള്‍ ക്ലബ്ബി’ന്റെ തിരക്കഥയൊരുക്കുന്നത്. അനുരാഗ് കശ്യപിനൊപ്പം ദിലീഷ് പോത്തന്‍, സൗബിന്‍ ഷാഹിര്‍ എന്നിവരും ചിത്രത്തില്‍ ഉണ്ട്.
