അയോധ്യയിലെ ശ്രീരാമ ക്ഷേത്രത്തിലെ പൂജിച്ച അക്ഷതം നടൻ മോഹൻലാൽ ഏറ്റുവാങ്ങി. ബിജെപി സംസ്ഥാന അധ്യക്ഷൻ കെ. സുരേന്ദ്രനാണ് മോഹൻലാൽ അക്ഷതം ഏറ്റുവാങ്ങുന്ന ചിത്രം സോഷ്യൽ മീഡിയയിൽ പങ്കുവച്ചത്. ആർ.എസ്.എസ് പ്രാന്തപ്രചാരകൻ എസ് സുദർശനിൽ നിന്നാണ് നടൻ അക്ഷതം ഏറ്റുവാങ്ങിയത്.
‘സൂര്യഗ്രഹണം നീങ്ങി അയോധ്യ ദീപാലംകൃതയായി കഴിഞ്ഞു. ശ്രീരാമചന്ദ്രനെ വരവേൽക്കാൻ നാടും നഗരവും ഒരുങ്ങിക്കഴിഞ്ഞു. മലയാളത്തിന്റെ പ്രിയനടൻ ശ്രീ. മോഹൻലാൽ സംഘത്തിന്റെ പ്രാന്തപ്രചാരകൻ സുദർശൻജിയിൽ നിന്ന് അക്ഷതം ഏറ്റുവാങ്ങി’- ചിത്രം പങ്കുവച്ചുകൊണ്ട് കെ. സുരേന്ദ്രൻ കുറിച്ചു.
നടൻ ശ്രീനിവാസൻ, ഉണ്ണി മുകുന്ദൻ, നടി ശിവദ, ബാലതാരം ദേവനന്ദ, സംവിധായകൻ വിനയൻ തുടങ്ങിയവർ കഴിഞ്ഞ ദിവസങ്ങളിൽ അക്ഷതം ഏറ്റുവാങ്ങിയിരുന്നു. പൂജ അനുഷ്ഠാനങ്ങളിൽ ഉപയോഗിക്കുന്ന ഒരു പൂജാദ്രവ്യമാണ് അക്ഷതം. ജനുവരി 22നാണ് പ്രതിഷ്ഠാ ചടങ്ങുകൾ നടക്കുക. അമിതാഭ് ബച്ചന്‍, അനുപം ഖേര്‍, മാധുരി ദീക്ഷിത്, അക്ഷയ് കുമാര്‍, പ്രമുഖ സംവിധായകരായ രാജ്കുമാര്‍ ഹിരാനി, സഞ്ജയ് ലീല ബന്‍സാലി, നിര്‍മാതാവ് മഹാവീര്‍ ജെയിന്‍, രോഹിത് ഷെട്ടി, ചിരഞ്ജീവി, മോഹന്‍ലാല്‍, ധനുഷ്, ഋഷഭ് ഷെട്ടി തുടങ്ങിയവര്‍ക്കും ചടങ്ങിലേക്ക് ക്ഷണമുണ്ട്.
